Պահանջում ենք մարդասպաններին

Հրանտ Դինքի սպանության գործի քննության երեկվա` 20-րդ նիստից առաջ Դինքի ընկերներն ընթերցեցին այն նամակը, որը հղել էին վարչապետ Թայիփ Էրդողանին:

«Պահանջում ենք բոլոր մարդասպաններին` ակհայտ և ոչ ակնհայտ» վանկարկող 50 հոգանոց խումբը հնչեցրեց նաև «Թո’ղ դատվի Ջեմիլ Չիչեքը: Մենք բոլորս Հրանտ ենք, բոլորս հայ ենք» կարգախոսները: Դոլմաբահչե պալատի առաջ հավաքված խումբը միացավ Բեշիքթաշի կառամատույցի հրապարակում իրեն սպասող 100 հոգանոց խմբին: Բեշիքթաշում գտնվող Ստամբուլի արդարադատության ատյանի առաջ լրագրող Բագրատ Էսթուքյանն ընթերցեց վարչապետ Էրդողանին ուղղված նամակը, որը ներկայացվել է նաև որպես մամլո հաղորդագրություն. «Փոքրամասնություններից բռնազավթվածի մի փոքրիկ մասը հետ տալու կապակցությամբ ելույթ ունենալիս ասում էիք, թե «այս երկրում ոչ ոք այլևս հոգեկան խռովք չի ապրելու»` հղում անելով Հրանտի հրաժեշտի նամակին: Հավատացե’ք, որ մեր անհանգստությունը երբեք այսքան մեծ չի եղել»:

Մամլո հաղորդագրության ընթերցումից հետո լրագրողների հարցերին պատասխանած նամակի հեղինակ Ադալեթ Աղալօղլուն շեշտելով, թե իրենք հետամուտ են լինելու Դինքի սպանության գործի բացահայտմանը, ասաց. «Մենք ժողովրդավարություն և արդարադատություն ենք պահանջում` որպես Հրանտի ընտանիքի անդամներ և ընկերներ»: Մամլո հաղորդագրության հրապարակման արարողությանը մասնակցեցին նաև Ժողովրդահանրապետական կուսակցության պատգամավոր Սեզգին Թանրըթուլուն և նախկին պատգամավոր Ուֆաք Ուրասը:

Մուրադ Քազանջը

20.09.2011

Հյուրիեթ