Թուրքական «Սաբահ» պարբերականն աղմուկ է բարձրացրել` կապված «նեո-ԱՍԱԼԱ»-ի ստեղծման հետ: Թուրքական պարբերականի տվյալներով, Միացյալ Նահանգներում ստեղծվել է մի կազմակերպություն, որը շատ նման է Հայաստանի Ազատագրության Հայ Գաղտնի Բանակին` ԱՍԱԼԱ-ին: Կազմակերպության անվանումն է «Ամերիկահայ Զինյալներ»:
«Կալիֆոռնիայի տարբեր հատվածներում շուրջ հազար հոգի հատուկ զինվորական պատրաստություն են անցնում: Նրանք սովորում են կրակել հրազենից, դիպուկահար զենքերից, անգամ հրետանուց: Այստեղ տիրում է զինվորական կարգապահություն: Առանձին գործում են նաև 2-5 հոգուց բաղկացած հատուկ խմբեր, որոնք խիստ գաղտնի պատրաստություն են անցնում, այդ թվում նաև մահափորձեր կատարելու համար: Կազմակերպությունը նաև ակտիվ քարոզչություն է իրականացնում Facebook-ում, ինչպես նաև ունի իր սեփական կայքը` Americanarmenianmilitia.com»,-նշված է «Սաբահում»:
«Ամերիկայի հայկական լեգիոն» անունը կրող կազմակերպությունը նպատակ է դրել պայքարել Հայաստանի և Միացյալ Նահանգների թշնամիների դեմ»,-նշում է թուրքական թերթ և հավելում.
«Թուրքիայի Ազգային հետախուզական ծառայությունն արդեն սկսել է զբաղվել հայկական կազմակերպության ուսումնասիրմամբ: Թուրք դիվանագետները նույնպես զգուշացրել են ամերիկյան կողմին «անօրինական կազմակերպության» գոյության մասին: Սպասվում է, որ վարչապետ Թայիփ Էրդողանի` ԱՄՆ կատարելիք այցի շրջանակներում կքննարկվի նաև այս հարցը»:
19.09.2011
HayNews.am
Leave a Reply