Սփյուռքի նախարարության նախաձեռնությամբ այս օրերին Հայաստանում կազմակերպված “Պոլսահայ համայնքի օրերը Հայաստանում” միջոցառումների շրջանակներում երեկ` սեպտեմբերի 17-ին, Երևանի “Առնո Բաբաջանյան” համերգային դահլիճում նշվեց “Մարմարա” օրաթերթի 70-ամյակը (այս տարի լրանում է օրաթերթի 71-րդ ամյակը, քանի որ այն հիմնվել է 1940 թ. օգոստոսի 31-ին, սակայն սիմվոլիկ կերպով նշվում է 70 ամյակը): Երեկույթը մեկնարկեց Սփյուռքի նախարարության հովանու ներքո գործող Համահայկական պատանեկան սիմֆոնիկ նվագախմբի կատարումներով` գեղարվեստական ղեկավար և գլխավոր դիրիժոր Էդուարդ Եսայանցի գլխավորությամբ: Երեկույթը շարունակվեց “Մարմարա” օրաթերթին նվիրված կարճ տեսագրության ցուցադրությամբ, որում ներկայացվում էին “Մարմարայի” խմբագրատան աշխատանքային առօրյան և օրաթերթի առաքելությունը: Տեսագրության ցուցադրությունից հետո ելույթներով հանդես եկան Սփյուռքի նախարար Հրանուշ Հակոբյանը, “Սփյուռք” գիտաուսումնական կենտրոնի տնօրեն Սուրեն Դանիելյանը, Հայաստանի ժուռնալիստների միության նախագահ Աստղիկ Գևորգյանը, Հայաստանի գրողների միության նախագահ Լևոն Անանյանը, ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանը: Երեկույթին մասնակցում էին նաև սփյուռքի տարբեր գաղթօջախներում տպագրվող մի շարք այլ հայկական թերթերի գլխավոր խմբագիրներ: Համերգային երեկոն վարեց ճանաչված դերասան Ազատ Գասպարյանը: Երեկույթն ավարտվեց պոլսահայ երգիչ Սահակ Պարթև Գարյանի և երգչուհի Լյուսի Քահվեջյանի ու դաշնակահար Համասփյուռ Մանուկյանի կատարումներով:
18.09.2011
www.akunq.net
Leave a Reply