Միթե սպասում են, որ հայկական եկեղեցին փլվի

Թեև Դիարբեքիրում գտնվող հայ կաթոլիկ եկեղեցու վերականգման նախագիծն ընդունվել է, սակայն եկեղեցին իսկ և իսկ շինհրապարակ է հիշեցնում: 3 տարի առաջ վերականգնվել սկսած եկեղեցին պահպանող Ազիզ Թոհումջուն նշեց. “Շուրջ մեկ տարի այստեղ ոչ ոք չի եկել, և ոչ մի աշխատանք չի կատարվել: Եկեղեցին հենց այդպես էլ թողնվել է ճակատագրի քմահաճույքին”:

Չնայած, որ Դիարբեքիրի կենտրոնում` Սուրի շրջանում, գտնվող և 16-րդ դարին պատկանող սույն հայ կաթոլիկ եկեղեցու վերականգման մասին որոշում է կայացվել, և վերականգնումն էլ սկսվել է, սակայն եկեղեցին գտնվում է ճակատագրի քմահաճույքին թողնված վիճակում: Քաղաքում կանգուն մնացած 9 եկեղեցիներից մեկը եղող կաթոլիկ եկեղեցու վերականգման նպատակով 2008 թ. մշակված նախազիծն ընդունվել է Թուրքիայի կառավարության Վաքըֆների գլխավոր վարչության կողմից: Վերոնշյալ նախագծի արժեքը կազմել է 548.900 թուրքական լիրա, իսկ վերականգման վերջնաժամկետ է նշանակվել 2009 թվականը: Թեև 2008 թ. մեկնարկած վերականգնողական աշխատանքներից անցել է շուրջ 3 տարի, սակայն դրանք դեռևս ավարտին չեն հասցվել: Չնայած որ գործն ստանձնած ֆիրման աշխատանքները պետք է ավարտեր 2009 թ., բայց աշխատանքները եկեղեցում մոտ 1 տարի դադարեցվել են ու թողնվել ճակատագրի քմահաճույքին:

Երբ այգու դռնից մուտք ենք գործում պատմական եկեղեցու գավիթը, դեմ ենք առնում շինանյութերի, իսկ եկեղեցու ներսում գտնվում են շինարարներին պատկանող տախտակներ, ավազ, առանց ապակու պատուհաններ: Ջեմալ Յըլմազ թաղամասի բնակիչ Ազիզ Թոհումջուն, թաղամաս, որում գտնվում է սույն եկեղեցին, հայտնում է, թե գիշերները եկեղեցին ընդամենը մեկ պահակ է հսկում, իսկ ցերեկներն այն մնում են առանց որևէ հսկողության: Թոհումջուն ասում է. “Հոգիս ցավում է, երբ այս վայրն այսպես դատարկ եմ տեսնում: Այդ պատճառով էլ ցերեկները ես եմ եկեղեցին պահպանում, որպեսզի որևէ բան չպատահի: Ոչ մեկին թույլ չեմ տալիս մուտք գործել եկեղեցի` բացառությամբ զբոսաշրջիկների: Եթե եկեղեցին տեր ունենար, վերականգնումն արդեն վաղուց ավարտված կլիներ, բայց քանի որ անտեր է, շուրջ մեկ տարի է, ինչ գտնվում է այս վիճակում”:

Ինչ վերաբերում է շինարարության կապալառու Շահաբեթթին Այաթային, որի հետ զրուցեցինք եկեղեցու վիճակի կապակցությամբ, ապա վերջինս հայտնեց, թե 2008-2009 թթ. վերականգնումը չհասցնելու պատճառով երկարաձգել են նախագծի ժամկետը: Այաթան որպես վերակագնման հետաձգման պատճառաբանություն բերեց այն փաստը, որ Թուրքիայի կառավարության Վաքըֆների գլխավոր վարչությանը ներկայացված էլեկտրականության նախագիծը դեռևս չի ընդունվել:

Դիջլե լրատվական գործակալությունը հաղորդում է Դիարբեքիրից

15.09.2011

http://www.evrensel.net/news.php?id=13586