Սփյուռքի նախարարության նախաձեռնությամբ սեպտեմբերի 16-19-ը կազմակերպվում են «Պոլսահայ համայնքի օրերը Հայաստանում», որի շրջանակներում երեկ` սեպտեմբերի 16-ին, ՀՀ ԳԱԱ Նախագահության նիստերի դահլիճում կայացան «Հայերի դերը Կ.Պոլսի մշակութային կյանքում» գիտաժողովը և Կարո Քյուրքմանի գրքերի շնորհանդեսը: Կարո Քյուրքմանը հարցազրույց է տվել «Ակունքի» թղթակից Մելինե Անումյանին, որը ներկայացնում ենք ստորև:
Հարց-Առաջին անգա՞մ եք Հայաստանում:
Պատասխան-Այո, առաջին անգամ: Ինձ գրքերս ներկայացնելու հնարավորություն ընձեռեցին: Փոքրիկ շնրոհանդես արեցի դրանց նվիրված: Այստեղ եմ եկել «Մարմարա» օրաթերթի և օրիորդ Մաքրուհու շնորհիվ:
Հարց-Խնդրում եմ` համառոտ ներկայացնեք Ձեր գրքերը:
Պատասխան-Սկզբում հեղինակել եմ դրամագիտությանը վերաբերող գրքեր: Այդ ընթացքում ծանոթացել եմ Ջյունեյթ Օլչերի հետ: Մոտ 15 տարի պատրաստել եմ նրա գրքերը: Հրատարակել եմ «Անատոլիայի կշիռն ու չափերը» վերնագրով մի գիրք: Այնուհետև, քանի որ աճուրդներում փորձագետ էի, այնտեղ կուտակածս գիտելիքները ներկայացրել եմ մի գրքում: Տպագրել եմ նաև օսմանյան շրջանում ծնված և ապրած մի քանի հայ նկարիչների մասին մի գիրք: Բացի այդ՝ աշխատություններ ունեմ նաև Քութահիայի (Կուտինա) վերաբերյալ. մի գիրք եմ հրատարակել Քութահիայի ստորագրությունների մասին: 1600-ականներից մինչև 1923 թ. Օսմանյան կայսրությունում բնակվող հայ հպատակներին պատկանող գործերի մասին հրատարակել եմ երկհատոր մի աշխատություն: Բնականաբար, սույն գիրքը տպագրելուց հետո բացահայտվել են նաև այնպիսի տեղեկություններ, որոնց մինչ այդ հասու չէի եղել: Այսինքն` առկա են նաև թերություններ:
Հարց-Քանի՞ գիրք եք հեղինակել:
Պատասխան-Ճիշտն ասած` չեմ հաշվել… 10-ի չափ:
Հարց-Ձեր գրքերը թուրքերի ուշադրությունը գրավու՞մ են:
Պատասխան-Մեծ ուշադրություն են վայելում նրանց կողմից: Գրքերս հայերից առավել թուրքերն են գնում: Նկարիչների վերաբերյալ գիրքս, օրինակ, ամենաշատը, հայերից էլ շատ թուրքերն են առել:
Հարց-Ինչու՞:
Պատասխան-Որովհետև նրանց գլուխն աշխատում է (ծիծաղում է): Փաստ է, որ թուրքերն ամենաշատն են հայկական արծաթներ հավաքում:
Հարց-Շնորհակալություն հարցազրույցի համար:
Պատասխան-Խնդրեմ:
16.09.2011
Leave a Reply