Սեպտեմբերի 16-ին ՀՀ Գիտությունների ազգային ակադեմիայի նախագահության նիստերի դահլիճում ՀՀ սփյուռքի նախարարության կազմակերպած «Հայաստանում պոլսահայ համայնքի օրեր» ծրագրի շրջանակներում կայացավ «Հայերի դերը Կ.Պոլսի մշակութային կյանքում» գիտաժողովը և Կարո Քյուրքմանի «Հայ նկարիչները օսմանյան կայսրությունում» խորագրով գրքերի ցուցադրությունը:
Ներկաներին ողջունեց և բացման խոսքով հանդես եկավ ՀՀ սփյուռքի նախարար Հրանուշ Հակոբյանը:
Բարձր գնահատելով Կ.Պոլսում ապրող հայության ջանքերը հայապահպանության և հայկական ավանդույթները պահպանելու, սերունդներին փոխանցելու գործում`նախարար Հակոբյանը գովասանքի ու դրվատանքի առանձնակի խոսքեր ուղղեց «Հայ նկարիչները օսմանյան կայսրությունում» գրքի հեղինակ Կարո Քյուրքմանին: Արժևորելով հայկական համայնքի եւ հայ մշակութային արժեքների պահպանման գործում հեղինակի դերը` գերատեսչության ղեկավարը պարոն Քյուրքմանին պարգևատրեց ՀՀ սփյուռքի նախարարության «Արշիլ Գորկի» մեդալով:
«Կ. Պոլիսը հայկական մշակույթի զարգացման կենտրոններից մեկն է: Ես հիացած ու տպավորված եմ պոլսահայերով, որոնք ապրելով Թուրքիայում, ստեղծում են հայկական մշակույթի բացառիկ արժեքներ»,-նշեց Հ.Հակոբյանը: Այդ առումով անգնահատելի է «Մարմարա» թերթի գլխավոր խմբագիր, գրող, հրապարակախոս Ռոպեր Հատտէճեանի դերը:
Հայաստանի Հանրապետության անկախության 20-րդ տարեդարձի առթիվ, ազգային շահերի պաշտպանության գործում ներդրած նշանակալի ավանդի, երկարամյա եւ արգասաբեր հայանպաստ գործունեության համար ՀՀ սփյուռքի նախարարը Հանրապետության Նախագահի անունից պարոն Հատտէճեանին հանձնեց «Մեսրոպ Մաշտոց» շքանշանը:
Դրվատանքի և ողջույնի խոսքեր ասացին ՀՀ ԳԱԱ նախագահ Ռադիկ Մարտիրոսյանը և ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանը:
Գիտոժողովի ընթացքում զեկույցներով հանդես եկան Կարո Քյուրքմանը, ով ներկայացրեց իր հեղինած «Հայ նկարիչները օսմանյան կայսրությունում» գիրքը, Արմեն Տեր-Ստեփանյանը, Սուրեն Դանիելյանը, Հասմիկ Ստեփանյանը` համապատասխանաբար` «Պոլիսը հայ մատենագրության մեջ», «Առարկայական խորհրդանշախաշտություն շարժումը և Զարեհ Խրախունու պոեզիան», «Հայերի դերը Օսմանյան կայսրության մշակութային կյանքում» թեմաներով:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՓՅՈՒՌՔԻ ՆԱԽԱՐԱՐՈՒԹՅՈՒՆ
ՏԵՂԵԿԱՏՎՈՒԹՅԱՆ ԵՎ ՀԵՌԱՀԱՂՈՐԴԱԿՑՈՒԹՅԱՆ ՎԱՐՉՈՒԹՅՈՒՆ
Leave a Reply