Հրանտ Դինքի ընկերները վարչապետին նամակ են հղել նրա ծննդյան օրվա նախօրեին (Հրանտ Դինքը ծնվել է 1954 թ. սեպտեմբերի 15-ին-Ակունքի խմբ.): Նամակի նպատակն արդարադատության պահանջն է:
Հրանտի ընկերները քննադատում են, որ սեպտեմբերի 19-ին շարունակվելիք դատական նիստերի շղթայում առաջընթաց չի գրանցվում, և ասում. «Հինգ տարի շարունակ արդարադատության մեր որոնումները կորցրել են իրենց արժեքը»:
Նամակում նաև ասվում է. «Թեև հանգուցյալի տանը երդում կերաք` ասելով, թե «Պատվովս խոսք եմ տալիս, որ արդարադատություն կլինի», սակայն Հրանտ Դինքին մատնացույց արած Ձեր տեղակալին դարձրեցիք «մեջլիսի նախագահ», իր գրասենյակում «Կայրենք դրա հոգին» պաշտոնապես ասած Ձեր նահանգապետին դարձրեցիք տեղակալ, իրեն վստահված Դինքի կյանքը չպաշտպանած անվտանգության Ձեր տեսուչին դարձրեցիք նահանգապետ, իսկ 17 տարեկան Օ. Ս.-ին` մեծն Օգյուն Սամասթ: Արյունը հանդարտվում է արդարադատության միջոցով. մենք բողոքում ենք»:
Դինքի ընկերները նամակում մի ապշեցուցիչ հարց են ուղղում վարչապետին. «Հարգելի’ վարչապետ, ո՞րն է դեպքերին ավելի խորամուխ լինելուն արգելք եղող այն «մեծ գյուղաքաղաքի գաղտնիքը»: Փոքրամասնություններից բռնազավթվածի մի փոքրիկ մասը հետ տալու կապակցությամբ ելույթ ունենալիս ասում էիք, թե «այս երկրում ոչ ոք այլևս հոգեկան խռովք չի ապրելու»` հղում անելով Հրանտի հրաժեշտի նամակին: Հավատացե’ք, որ մեր անհանգստությունը երբեք այսքան մեծ չի եղել»:
Հրանտի ընկերները, «չենք լռելու հանուն արդարադատության» ուղերձը հղելով, ավելի մեծ ջանքեր են պահանջում վարչապետից:
Նամակում նաև նշվում է. «Պարո’ն վարչապետ, այն, ինչ անշունչ առարկային է պատահում, փոխհատուցվում է, շնչավորին պատահածի համար էլ այդպես վարվեք: Անատոլիայի հողերից Հրանտ Դինքին ընդամենը 1մ2 տարածք բաժին ընկավ, այն էլ` գերեզման: Տեսախցիկ կոչված vak’a-nüvis-ը (Օսմանյան կայսրության ժամանակաշրջանում դարաշրջանի իրադարձություններն արձանագրելու պարտականությունն իրականացնող պետական պաշտոնական պատմագիր-Ակունքի խմբ.) ջնջվել է, մեզ հասած 2007 թ. հունվարի 19-ի (Դինքի սպանության ամսաթիվը-Ակունքի խմբ.) դեպքերի շղթայից 5 հոգի ենք հաշվել` Հրանտի դեմ թակարդ պատրաստածներից: Ովքե՞ր են դրանք, հարգելի’ վարչապետ: Պահանջում ենք բոլոր մարդասպաններին` ակհայտ և ոչ ակնհայտ: Եղիցի’ արդարադատություն, թո’ղ հաղթանակի արդարությունը»:
http://www.cnnturk.com/2011/guncel/09/14/dinkin.arkadaslarindan.basbakana.mektup/629256.0/index.html
Leave a Reply