Ստամբուլի 16-րդ ծանր քրեական հանցագործությունների դատարանում լսված Oda Tv-ի գործին վերաբերող մեղադրական եզրակացության մեջ արձանագրվել է, թե Թուրքիայի Ազգային հետախուզական կազմակերպության Միջին Ասիայի նախկին պատասխանատու Քյաշիֆ Քոզինօղլուն Թուրքիայի զինված ուժերին (TSK) և Ազգային հետախուզական կազմակերպությանը (MİT) պատկանող 17 գաղտնի փաստաթղթեր է հանձնել Սոներ Յալչընին:
Ըստ «Թարաֆ» օրաթերթի` Oda Tv-ի գործով մեղադրական ակտը կարևոր մանրամասներ է պարունակում Հատուկ ուժերի թևերից մեկը եղող` Մարտի ժամանակ որոնողափրկարարական ջոկատի (MAK) հիմնադիրներից Միջին Ասիայում Թուրքիայի Ազգային հետախուզական կազմակերպության նախկին պատասխանատու Քյաշիֆ Քոզինօղլուի առնչությամբ: Ամբաստանագրում հերքվել են կալանավոր Քոզինօղլուի այն ցուցմունքները, թե ինքը չի ճանաչում Սոներ Յալչընին և տեղեկություններ չի տվել որևէ մեկին: Մեղադրական եզրակացության մեջ որպես ապացույց է բերվել Oda Tv-ի համակարգիչներից մեկում հայտնաբերված և ենթադրաբար Սոներ Յալչընի կողմից 2010 թ. օգոստոսին գրված մի word փաստաթուղթ, որը կրում է “Koz.doc” վերնագիրը, և որում նշված է. «Ռուսաստանի և Ուզբեկստանի համայնքներում կատարված գործողությունների մասին Քոզինօղլուից ստացված փաստաթղթերը պետք է անպայմանորեն օրակարգ բերել: Պետք է գնահատականներ տալ նաև Քոզինօղլուից ստացված մյուս փաստաթղթերին»:
Ամբաստանագրում ասվում է. «Սրա շնորհիվ պարզվել է, որ կասկածյալ Քյաշիֆ Քոզինօղլուն հաղորդակցման մեջ է եղել կասկածյալ Սոներ Յալչընի հետ և իր ձեռք բերած տեղեկությունները հաղորդել Յալչընին»:
Չորս փաստաթղթերը Թուրքիայի զինված ուժերի գաղտնի վավերագրերն են
Մեղադրական ակտում “kozinoğlu3” վերնագրով թղթապանակում հաղորդվում է, որ գտնվել են «գաղտնի» և «ծառայողական օգտագործման համար» նշումներով, զինվորական բովանդակությամբ պաշտոնական գրություններ ու տեղեկություններ, ինչպես նաև` «Ազգային հետախուզական կազմակերպության (MİT) խորհրդականին» բլանկով փաստաթղթեր: Մեղադրական եզրակացության մեջ նշվում է, որ Թուրքիայի զինված ուժերին և Ազգային հետախուզական կազմակերպությանը պատկանող այդ գաղտնի փաստաթղթերն ուղարկվել են Քոզինօղլուի կողմից, և այդ վավերագրերից չորսը պատկանում են Թուրքիայի զինված ուժերին, դրանք Թուրքիայի քրեական օրենսգրքի 334-րդ հոդվածով եղել են գաղտնի փաստաթղթեր: Ամբաստանագրում Քոզինօղլուն մեղադրվում է «Պետության անվտանգությանը վերաբերող տեղեկությունների հաղորդման մեջ, տեղեկություններ, որոնք պետք է գաղտնի պահվեին` պետության ներքին և արտաքին քաղաքական շահերի համար»:
Հաշվառվել են Լիջե գավառի հայերը
Մեղադրական եզրակացությունում հիշեցվում է նաև, որ Oda Tv-ում կատարված խուզարկության ժամանակ գտնվել է 84 էջանոց մի ցանկ, որում նշվել են հայ քաղաքացիների թվի գրանցումները: Ամբաստանագրում հիշեցում կա նաև այն մասին, թե «Դիարբեքիր նահանգի Լիջե գավառում բնակվող հայկական ծագմամբ քաղաքացիների թվի գրանցումների օրինակները գտնվել են ձեռագրով` կիսափակ թղթապանակում, որում արձանագրվել են մոտ 1600 հաշվառված մարդկանց տվյալները: Մեղադրական ակտում նաև նշվում է. «Կրոնական բաժնում շատ քիչ թվով անձանց անվան դիմաց է «մուսուլման» գրված, իսկ մեծ մասի դիմաց նշված է «քրիստոնյա» կամ ուղղակի` «քր.»:
http://www.t24.com.tr/kozinoglu-tsk-ve-mite-ait-17-gizli-belgeyi-soner-yalcina-vermis/haber/167820.aspx
Leave a Reply