Ավերվում են Տեկորում գտնվող 5 եկեղեցիները

Կարսի Տեկոր գավառում գտնվող 5 եկեղեցիներն ավերվում են անխնամ և անտարբեր վերաբերմունքի պատճառով:

Անի անտիկ քաղաքից մոտ 25 կմ հարավ-արևելք և Տեկոր գավառի կենտրոնից 5 կմ հեռավորության վրա գտնվող երեք ժայռերի ծերպերի վրա կառուցված 5 եկեղեցիներից մեր օրեր է հասել միայն մեկը` Սուրբ Սարգիս եկեղեցին, որն էլ, սակայն, վերածվել է հովիվների և գանձ որոնողների հավաքատեղիի:

Կարսի սակավ տուրիստական կենտրոններից մեկը և օտարերկրացի զբոսաշրջիկների այցելության վայրը եղող սույն եկեղեցին, եթե միջոցներ չձեռնարկվեն, ապա մյուս չորս եկեղեցիների նման կարճ ժամանակահատվածում կփլվի և կանցնի պատմության գիրկը:

Եկեղեցու պատերը, որի ներսն օթևան է դարձել անասունների համար, փլվել են, իսկ քարերը պոկվում ու տարվում են քաղաքացիների կողմից: Հինգ եկեղեցիները, որոնց պահպանման համար ոչ մի անվտանգության միջոցներ չեն ձեռնարկվել, իսկ և իսկ մատնված են ճակատագրի քմահաճույքին:

Հինգ եկեղեցիները

Տեկորում գտնվող բոլոր հինգ եկեղեցիներն էլ գմբեթավոր են և հատած քարերով կառուցված: Այդ հինգ եկեղեցիներն են եղել Սուրբ Կարապետը, Սուրբ Աստվածածինը, Սուրբ Ստեփանոսը, Սուրբ Գրիգորը և Սուրբ Սարգիսը: Մեր օրեր է հասել միայն Սուրբ Սարգիս եկեղեցին:

Եկեղեցին չունի որևէ արձանագրություն, որը լույս կսփռեր վանքի հիմնադրման կամ եկեղեցիների կառուցման տարեթվի և այլ հանգամանքների վրա: Վանքը լքվել է 13-րդ դարում` մոնղոլական ասպատակություններից հետո:

1878 թ., երբ Կարսի մարզն անցել է ռուսական տիրապետության տակ, Հինգ եկեղեցիները փոխանցվել են Հայ առաքելական եկեղեցուն: Շինությունները վերանորոգվել են, վանքը վերստին բացվել է կրոնական արարողությունների համար: Այստեղ սենյակներ են կառուցվել նաև քահանաների և ուխտավորների համար: Դրանք կառուցվել են ժայռի ամենամեծ ծերպի եզրին՝ ստորոտին գտնվող ձորահովտի գետի ափին, ինչպես նաև` Սուրբ Սարգիս եկեղեցու հյուսիս-արևմուտքում:

http://www.haber3.com/digorda-bulunan-5-kiliseler-yikiliyor-1011213h.htm