Ֆրանսահայ Միշել Պետրոսյանը, ով այսօր արդեն 90-նն անց է, «Լեվանտեում ազատ Ֆրանսիայի պատմությունը» հուշագրությունում ներկայացնում է Շերիֆ Բեյի վկայությունները` հայ ժողովրդի ծրագրված ոչնչացման մասին:
Շերիֆ Բեյը Առաջին համաշխարհայինի տարիներին ծառայել է Հալեպի ոստիկանապետ Մուստաֆա Ադուլհալիկ բեյի հրամանատարության ներքո: Վկայությունը հրապարակվել 1946թ. ապրիլի 24-ին Զեբդանիում (Սիրիա), հաղորդում է «Nouvelles d`Arménie»-ը:
Շերիֆ Բեյի վկայությունում ասվում է.
«Ես խոստովանում եմ, որ Առաջին համաշխարհայինի ընթացքում Հալեպի շրջանում իմ զինվորական գործունեության ժամանակ մեր զինվորների կողմից տեղահանված հայերի արյունալի, անխնա կոտորածների եւ տառապալից տեսարանների ականատեսն եմ եղել: Ես ցավում եմ անմարդկային բռնության այդ արարքների համար, որոնք մեր երկրին ու ժողովրդին արժանի չեն: Ես խստորեն դատապարտում եմ դրանք եւ դրա համար պատասխանատու եմ համարում այն ժամանակվա ղեկավարությանը, որոնք Միություն եւ առաջադիմություն կուսակցության անդամներ էին, ովքեր էլ ոչնչացման հրաման էին տվել, եւ որոնց խղճին է հարյուր հազարավոր հայերի սպանությունը, ում հետ մենք կարող էինք խաղաղ ապրել եւ երջանիկ լինել:
Այդ ժամանակ իշխանության վերնախավում գտնվող մեր առաջնորդները հանցագործություն են կատարել, որը ներում չունի եւ պետք է դատապարտվի ու խիստ պատժվի, որպեսզի անմեղ թուրքերին չխառնեն իրական մեղավորների հետ, եւ որպեսզի հաջորդ սերունդներն իմանան այդ մասին ու երբեք չմոռանան:
Հենց այդ սերունդների վրա է լինելու մեր պատմության սեւ էջը մաքրելու անվերապահ պարտականությունը: Ուստի ես մեր երկու ժողովուրդներին կոչ եմ անում ապրել միասին որպես եղբայրներ` մշտական խաղաղության եւ անվտանգության մեջ»:
08.09.2011
Leave a Reply