Աղթամար կղզին պատրաստ է պատարագին

Վանա լճում գտնվող Աղթամար եկեղեցում այս տարվա սեպտեմբերի 11-ին նախատեսվող պատարագի համար կատարվող նախապատրաստական աշխատանքները հասել են վերջին փուլին:

Վանի Գևաշ գավառին ենթակա Աղթամար կղզում 915-935 թթ. Վասպուրականի թագավոր Գագիկ Առաջինի կողմից Մանուել Վարդապետին կառուցել տված Աղթամար եկեղեցում Թուրքիայի մշակույթի և զբոսաշրջության նախարարության կողմից որոշում է կայացվել 95 տարվա ընդմիջումից հետո տարին մեկ անգամ պատարագ մատուցել: 95-ամյա դադարից հետո առաջին անգամ անցյալ տարի Սուրբ Խաչ տոնին բացված եկեղեցում երկրորդ անգամ պատարագ է իրականացվելու այս տարվա սեպտեմբերի 11-ին: Պատարագի համար Վանի նահանգապետարանի համակարգությամբ մեկ ամիս առաջ աշխատանքներ են մեկնարկել Գևաշի գավառապետարանի, Մշակույթի և զբոսաշրջության նահանգային վարչության, ժանդարմերիայի և անվտանգության, առողջապահության, արտակարգ իրավիճակների, միջավայրի պահպանման, ցամաքային ճանապարհների, մամլո և հասարակայնության հետ շփումների վարչությունների, նահանգի հատուկ վարչության, ինչպես նաև` քաղաքացիական-հասարակական կազմակերպությունների կողմից: Պատարագի օրը ոչ մի միջադեպի տեղիք չտալու համար նահանգապետարանը հանդես է եկել անհրաժեշտ հրահանգներով, և մարդիկ տեղեկացվել են պատարագին մասնակցող անձանց անվտանգության և կիրառվելիք կանոնների վերաբերյալ:

Գևաշի քաղաքապետարանի Մշակույթի և զբոսաշրջության նահանգային վարչության աշխատակիցների կողմից կղզում և ափին կատարվող աշխատանքները դեռ ընթացքի մեջ են: Քանի դեռ շարունակվում են կղզի հասնելու համար կառուցվող կառամատույցի աշխատանքները, կղզու շրջակայքի մաքրությունն էլ ապահովվում է քաղաքապետարանի խմբերի կողմից: Կղզում, որտեղ դրվել է 10 հավաքովի զուգարան, խփվել է նաև մի վրան` Վանի նահանգապետարանի հաղորդակցության համար: Կղզու դիմացի ափին բացվել է ավտոկայան: Կղզում, ուր վրան է կանգնեցվելու նաև լրագրողների համար, պատարագից մեկ օր առաջ և պատարագի օրը ներկա են գտնվելու նաև անվտանգության և առողջապահության խմբերը:

Ինչպես անցյալ տարի, այս տարի ևս Պոլսո հայոց պատրիարքարանի գլխավոր փոխանորդ, արքեպիսկոպոս Արամ Աթեշյանի ձեռամբ մատուցվելիք պատարագին, Թուրքիայի հայ քաղաքացիներից բացի, այցելուներ են սպասվում նաև Հայաստանից, տարբեր երկրներից և երկրի ներսից:

Գևաշի գավառապետ Յուսուֆ Գյունին նշեց, թե սեպտեմբերի 11-ին երկրորդ անգամ իրականացվելիք պատարագի ծրագիրը կատարվելու է Պոլսո հայոց պատրիարքարանի կազմակերպությամբ, իսկ Վանի նահանգապետարանը հանդես է եկել ամեն տեսակի աջակցությամբ` անվտանգության, այցելուներին տեղավորելու և փոխադրելու հարցերում: Գյունին ասաց. «Կիրակի օրը նախատեսվող պատարագի ծրագրի համար նահանգապետարանի համակարգությամբ մեր կողմից կատարվող նախապատրաստական աշխատանքները հասել են ավարտական փուլին»: Գյունին նաև հայտնեց, որ կղզու դիմացի կողմում գտնվող Վան-Բիթլիս (Բաղեշ) ցամաքային ճանապարհի վրա հետիոտների համար անցում է կառուցվել Տրանսպորտի նախարարության կողմից, և որ կառամատույցի կառուցման աշխատանքները դեռ շարունակվում են: Գյունին հաղորդելով, թե կառամատույցի կառուցման աշխատանքներն ավարտին կհասցվեն նախքան պատարագի օրը, նաև հայտնեց, որ հյուրերի` կղզի հասնելու համար նախապատրաստվել են 25 զբոսանավեր:

Գյունին նշելով, թե քաղաքի հյուրանոցների բոլոր համարները զբաղեցվել են, նաև արձանագրեց. «Գևաշի գավառապետարանի և Աղթամարի քաղաքապետարանի կողմից այս տարի մեկնարկած աշխատանքների շրջանակներում երկրի ներսից և արտերկրից եկող մեր հյուրերը հյուրանոցներում և իջևանատներում տեղ չգտնելու դեպքում կտեղավորվեն Գևաշի գավառապետարանում և Աղթամարի քաղաքապետարանում աշխատող մեր քաղաքացիների տներում: Այդ հարցի առնչությամբ արվող մեր նախապատրաստական աշխատանքներն էլ են ավարտվել, և մոտ 100 ընտանիք արդեն պատրաստ է իր տան դռները բացել այցելուների առաջ: Քաղաքի կենտրոնի և գավառի իջևանատներում որևէ դժվարություն լինելու դեպքում մեր հյուրերին կարող ենք ընդունել այստեղ, իսկ դա մեր կարծիքով անչափ կարևոր է` այս կողմերի մարդկանց հյուրընկալությունը և հանդուրժողականությունը ցուցաբերելու տեսանկյունից»:

Գյունին ասաց, որ Վանը դրսից կարող է թվալ անվտանգության խնդիրներ ունեցող քաղաք, սակայն իրականում այստեղ բնակվող մարդիկ անվտանգության հարցում որևէ նեղություն չեն ունենում, նաև նշեց. «Որևէ խնդիր չունենք անվտանգության տեսանկյունից: Նման միջոցառումները լավ առիթ են նաև մեր շրջանի և քաղաքի մասին ընկալումները ջարդելու առումով: Այդ իմաստով էլ ամեն տեսակի ծրագրեր ենք կազմել` անվտանգության կապակցությամբ: Կատարելու ենք մեր պաշտոնական պարտականությունները` առանց որևէ մեկին նեղացնելու, բայց նաև` առանց անվտանգության համար մտահոգության տեղիք տալու: Պատարագի օրը կղզում, անվտանգության և առողջապահության խմբերն էլ ներառյալ, աշխատելու է 400 հոգի»:

Ջիհան լրատվական գործակալություն

08.09.2011