Թուրքական http://www.acikgazete.com էլեկտրոնային թերթի հաղորդմամբ` Իսրայելը հակահարձակման է անցնում` «Մավի Մարմարայի» զեկույցից հետո Թուրքիայի կողմից նախատեսվող 5 կետանոց միջոցառումների փաթեթի հրապարակումից հետո: Ըստ հրեական մամուլի` նախատեսվում է Հայոց ցեղասպանության ճանաչման հարցը վերստին բերել Իսրայելի խորհրդարանի օրակարգ:
Թուրքական «Հաբերթյուրք» թերթի համաձայն` Իսրայելի Ազգային միասնություն կուսակցության ներկայացուցիչ, Կնեսետի անդամ Արյե Էլդադը, խոսելով «Մավի Մարմարայի» իրադարձությունների ժամանակ վիրավորված իսրայելցի զինվորների համար Թուրքիայից փոխհատուցում պահանջելու անհրաժեշտության մասին, հայտնել է, թե Իսրայելի խորհրդարանում աշխատանքները վերսկսելուն պես Կնեսետ է ներկայացվելու Հայոց ցեղասպանության ճանաչման նախագիծ:
Թուրքական լրատվամիջոցները նաև հաղորդում են, թե վերջին զարգացումների համատեքստում մերձեցում է նկատվում ԱՄՆ-ում խիստ ազդեցիկ իսրայելական լոբբիի և հայկական լոբբիի միջև:
07.09.2011
Leave a Reply