Սիբել Հյուրթաշ
1915 թ. դեպքերի (Հայոց ցեղասպանության-Ակունքի խմբ.) 100-ամյա տարելիցի՝ 2015 թ. համար, այսպես կոչված*, հայկական սփյուռքի կողմից աշխարհով մեկ մեկնարկած քարոզչական աշխատանքները գործունեության են մղել նաև (Թուրքիայի) արտաքին գործերի նախարարությանը, որը հաղորդել է իր դեսպանատներին. «Ուշադի’ր եղեք: Սփյուռքի հետ սերտ շփումների մեջ մտնելով` արգե’լք դարձեք այդ գործողություններին»:
Արտաքին գործերի նախարարությունն ահազանգել է Հայոց ցեղասպանության 100-ամյա տարելիցի՝ 2015 թ. կապակցությամբ: Պարզվել է, որ Արտաքին գործերի նախարարությունը բոլոր դեսպանատներին շրջաբերական է ուղարկել` 100-ամյա տարելիցի շրջանակներում սփյուռքի կողմից որոշ ժամանակ առաջ սկսված գործողություններից անմիջապես հետո: Արտաքին գործերի նախարարության կողմից հղված և «խիստ գաղտնի» կնիքը կրող շրջաբերականում արտակարգ և լիազոր դեսպաններից պահանջվել է պատրաստ լինել` 100-ամյա տարելիցի՝ 2015 թ. համար: Շրջաբերականում, որում հիշեցվել է, թե սփյուռքը համայն աշխարհում աշխատանքներ է կատարում «ցեղասպանության ճանաչման» համար, հաղորդվել է նաև, որ դեսպաններից ակնկալվում է «սփյուռքի հետ սերտ շփումների մեջ մտնելով` արգելք լինել այդ գործողություններին»: Շրջաբերականով պահանջվել է նաև, որ քարոզչություն տարվի այն երկրներում իրականացվող բանակցություններում, որտեղ Թուրքիան ունի արտակարգ և լիազոր դեսպաններ:
Սփյուռքը մեծ արագություն է վերցրել
Ինչ վերաբերում է 2015 թ. որպես «նպատակային տարի» ընտրած սփյուռքին, ապա վերջինս մշակել է համայն աշխարհն ընդգրկող գործողությունների ծրագիր, որի շրջանակներում նպատակ է դրվել Հայոց ցեղասպանության ճանաչման համար գործի դնել բոլոր տեսակի հաղորդակցության միջոցները և զարգացնել դիվանագիտական հարաբերությունները: Սփյուռքի օրակարգում է ընդգրկվել նաև «Այլևս երբե’ք» խորագրով համերգը, որի շրջանակներում նախատեսվում է, որ համաշխարհային ճանաչում ունեցող արվեստի գործիչները համայն աշխարհում համերգներ տան` «Հայոց ցեղասպանության հիշատակին» թեմայով: Բացի համերգներից՝ օրակարգում է նաև մի ֆիլմի նկարահանումը: Նշվում է, թե սփյուռքը պատրաստվում է ականավոր ամերիկացի ռեժիսոր ու սցենարիստ Սթիվեն Սփիլբերգին առաջարկել մի ֆիլմ նկարահանել` հայկական դեպքերի (Հայոց ցեղասպանության-Ակունքի խմբ.) թեմայով: Ողջ աշխարհում բացվելիք թանգարանների և իրականացվելիք միջոցառումների շնորհիվ ևս հայկական սփյուռքը օրակարգում է պահելու 2015-ին ցեղասպանություն է կատարվել թեզը (հեղինակը հավանաբար նկատի ունի 1915 թիվը, եթե 2015-ին էլ ցեղասպանություն չի ակնկալում-Ակունքի խմբ.): Սփյուռքը, որը հրատարակելու է Անգլիայի, Ֆրանսիայի, ԱՄՆ-ի, Կանադայի և Իտալիայի պետական արխիվային փաստաթղթերը, նպատակադրվել է առաջնային տեղ հատկացնել նաև ԶԼՄ-ներով տարվող քարոզչությանը: Ծրագրի մեջ է ներառվել նաև 1915 թ. դեպքերի ժամանակ տեղահանված հայերի կողմից դատական գործերի հարուցումը` Թուրքիայից փոխհատուցում ստանալու համար: Ներկայում քննվող հայցերից բացի՝ հարուցվելու են նաև նոր դատական գործեր` այդպիսով գրավելով միջազգային հանրության ուշադրությունը:
Ի՞նչ է անելու Թուրքիան
Արտաքին գործերի նախարարությունը սփյուռքի վերոհիշյալ գործողությունների դեմ ռազմավարություն մշակելու համար նախ գործի է դրել արտակարգ և լիազոր դեսպաններին: Ըստ ստացված տեղեկության` Արտգործնախարարությունը աշխատանքներ է սկսել նաև սփյուռքի գործողությունների դեմ Թուրքիայի կողմից ցուցաբերվելիք դիրքորոշման ուղղությամբ:
«Հաբերթյուրք» օրաթերթ
03.09.2011
*Տարօրինակ է թուրք լրագրողի «այսպես կոչված, հայկական սփյուռք» արտահայտությունը: Սովորաբար թուրքական մամուլն ու թուրք գործիչները «այսպես կոչված» բառակապակցությունն օգտագործում էին ցեղասպանություն բառի հետ: Ըստ երևույթին թուրք լրագրողը փորձում է սփյուռքի գոյության փաստն էլ ժխտել կամ դնել կասկածի տակ: http://akunq.net-ի խմբագրություն
Leave a Reply