«Արմինյն միրոր սփեքթեյթր» շաբաթաթերթի փոխանցմամբ` օգոստոսի 8-ին Անկարայում Միթհաթ Փաշա պողոտայի վրա գտնվող «Անկարա Յափը» Արվեստի կենտրոնում կայացել է հայազգի երգիչ մահվան երկրորդ տարելիցի ոգեկոչումը: «Արամը Մերձավոր Արեւելքի ժողովուրդների ձայնն է», նշել է այդ միջոցառման կազմակերպիչներից մեկը` Սաիդ Չեթինօղլուն: «Միրոր սփեքթեյթրը» լուրը արտատպել է «Հուրրիեթ դեյլի նյուզ» թերթից, որտեղ Վերջիհան Զիլֆիօղլուն հավելել է, որ երկրորդ միջոցառումը երգչի հիշատակին կայանալու է հոկտեմբերի 15-ին Դիարբեքիրում:
Արամ Տիգրանը հանրությանը քաջածանոթ է առավելաբար իր քրդերեն երգերով: «Նա ազատության համար պայքարող ժողովուրդների երգիչն է, ճնշված մարդկանց շունչը: Եթե մենք չենք կարող նրա մարմինը ֆիզիկապես ետ բերել, ապա կարող ենք նրա ձայնն ու շունչը մի անգամ եւս ըմբոշխնել»,-ասել է Չեթինօղլուն:
Հայազգի երգիչը վախճանվել էր Հունաստանում օգոստոսի 8-ին` երկու տարի առաջ, եւ իր կտակում ցանկություն հայտնել թաղվել Դիարբեքիրում: Թուրքական կառավարությունը մերժել էր ցանկությունն` ասելով, որ նա Թուրքիայի քաղաքացի չէր:
«Նախարարության որոշումով մարդիկ, որոնք Թուրքիայի քաղաքացի չեն, կարող են թաղվել այս հողում: Պետք է հարգեին Տիգրանի ցանկությունը, բայց նրանք մերժեցին, որովհետեւ նա հայ էր»,-հայտարարել է Չեթինօղլուն` ակնկալելով աջակցություն բոլոր նրանց կողմից, ովքեր հավատում են ժողովուրդների բարեկամությանը:
Կառավարության մերժումից հետո Տիգրանի ընտանիքը դիմել էր արտգործնախարարություն եւ մշակույթի նախարարություն, բայց դրական պատասխան չստանալով` երգիչ Արամ Տիգրանի մարմինը ի վերջո հողին էր հանձնվել Բրյուսելում:
«Տիգրանի հորինած երգերը բազմաբնույթ էին: Նա նաեւ երգում էր տարբեր լեզուներով եւ բոլորովին զարմանալի չէ, որ հայ լինելով` նա մեծապես նվիրված էր քրդական երաժշտությանը: Մենք կոգեկոչենք նրա հիշատակը Դիարբեքիրում հոկտեմբերի 15-ին»,-եզրակացրել է Չեթինօղլուն:
«ԱԶԳ» ՕՐԱԹԵՐԹ #155
03-09-2011
Leave a Reply