Շուրջ 600 տարի որպես մզկիթ օգտագործվող Էրզրումի Հահո եկեղեցում պահպանվել են խաչը և քրիստոնեական բովանդակությամբ որմնանկարներ: Մզկիթի իմամ Օսման Այդընի բացատրությամբ դա վկայություն է այն բանի, որ «Իսլամը հանդուրժողական կրոն է, այդ իսկ պատճառով էլ դարեր շարունակ որմնանկարները չենք ոչնչացրել, պահպանել ենք»:
Իմամի անամոթությանը լկտիաբար ձայնակցում է http://www.takvim.com.tr/Guncel/2011/09/01 էլեկտրոնային թերթը. «Անհամար մշակույթներ ապաստանած Անատոլիան այս անգամ էլ Էրզրումում կրծքին սեղմեց հանդուրժողականությունը: Բաղբաշ քաղաքում գտնվող հազարամյա Հահո եկեղեցին արդեն 600 տարի է` որպես մզկիթ է օգտագործվում: Թաշ ջամի (մզկիթ) կոչված շինության քրիստոնեական ստեղծագործությունները պահպանվել են: Միայն կառույցի ներսն է որպես մզկիթ ձևավորված»:
Պարոնայք «հանդուրժողներ», թե բուն Անատոլիան, թե ձեր ակնարկած Անատոլիան, որը պատմական Հայաստանն է, ստեղծել են անհամար մշակույթներ, բայց չեն ոչնչացրել, նրանք անգամ ձեր բարբարոս նախնիների «մշակույթն» են ընդունել ու հանդուրժել, բայց այժմ որտե՞ղ են նրանք: Մշակութաստեղծ ու բարբարոս ժողովուրդների տարբերությունը հանրահայտ է. առաջիններն ստեղծում են, վերջինները՝ կործանում, սպանում, թալանում, գողանում ուրիշներինը: Այա Սոֆյայից մինչև Անիի մայր տաճար միայն ձեզ բնորոշ ու միայն ձեզ հասկանալի «հանդուրժողականությամբ» ավերեցիք, պղծեցիք հազարամյակների մշակույթները, իսկ դրանք ստեղծողներին մորթեցիք, թրքացրիք, իսլամացրիք, ցեղասպանության ենթարկեցիք (հայեր, ասորիներ, հույներ…):
Արդ, երբ գողացված ու պղծված մի եկեղեցու վրայից տիրոջ անունը (խաչը) չեք ջնջել (կամ չեք հասցրել ջնջել), ներկայացնում եք որպես հանդուրժողականություն:
Եվ անամոթաբար հպարտանում եք դրանով:
Գուցե թուրքական հանդուրժողականությունը հենց դա՞ է:
Leave a Reply