Ինչպես հայտնում է «Ակօս» շաբաթաթերթը, փլուզման եզրին հայտնված Դիարբեքիրի Սուրբ Կիրակոս եկեղեցում, վերանորոգումն ավարտելուց հետո, սույն թվականի հոկտեմբերի 23-ին` կիրակի օրը, մոտ 30 տարվա դադարից հետո պատարագ է մատուցվելու:
Սուրբ Կիրակոս եկեղեցու վաքըֆի նախագահ Վարդգես Էրգյուն Այըքը տեղեկացնելով, որ եկեղեցու շենքի վերանորոգման աշխատանքները մինչև պատարագ ավարտին են հասցվելու, հայտնեց, որ նախագիծն ամբողջությամբ կյանքի կոչելու համար ֆինանսավորող են փնտրում:
Միջին Արևելքի ամենամեծ հայկական եկեղեցու` Դիարբեքիրի Սուրբ Կիրակոսի երկու տարի առաջ սկսված վերանորոգման աշխատանքների մեծ մասն ավարտին են հասել: Վաքըֆի նախագահ Վարդգես Էրգյուն Այըքը հայտնեց, որ գլխավոր շենքի աշխատանքներն ավարտին են հասել, սակայն եկեղեցու բակի աշխատանքները վերջացնելու համար նյութական աջակցության կարիք են զգում: Այըքը հիշեցնելով, որ նախագիծը կյանքի է կոչվել Դիարբեքիրի Բույուքշեհիրի և Սուրի քաղաքապետարանների, արտերկրում և Թուրքիայում գործող տարբեր միությունների և բարեգործների աջակցությամբ, ասաց, որ դեռ 1 միլիոն 4 հարյուր հազար լիրայի կարիք ունեն:
Այըքը հոկտեմբերի 23-ին մատուցվելիք պատարագի վերաբերյալ ասաց. «Պատարագը մատուցվելու է արքեպիսկոպոս Աթեշյանի գլխավորությամբ: Ծրագրի մանրամասնությունների վերաբերյալ աշխատանքները ճշտվում են: Մասնակցություն են ցուցաբերելու նաև պետության և կառավարության բարձրաստիճան պաշտոնյաներ: Հայաստանից մի խումբ արվեստագետներ են ելույթ ունենալու»:
«Ակօս», թիվ 803
Leave a Reply