Լրագրող Հրանտ Դինքի սպանության գործով հարուցված դատավարության վերաբերյալ դատավճիռ չկայացվեց

Թուրքական TRT-ի փոխանցմամբ լրագորղ Հրանտ Դինքի սպանության մեջ մեղադրվող Օգյուն Սամասթի դատավարությունը, որն ընթանում է Ստամբուլի անչափահասների գործերով դատարանում, մեղադրյալի վերջին պաշտպանական ճառի համար հետաձգվել է մինչև հուլիսի 25-ը:

Մեղադրյալ Սամասթը առավոտյան դատարան է բերվել Քանդըրա Ֆ տիպի բանտից, որտեղ կալանքի տակ է գտնվում:

Օգյուն Սամասթին կալանավայրից դատարան տեղափոխելու ժամանակ անվտանգության խիստ միջոցառումներ են ձեռնարկվել, քանի որ ավելի վաղ հայտնի էր դարձել, որ նրա դեմ մահափորձ է կազմակերպվում: Բացի այդ՝ դատարանի շենքը ստուգվել է նաև պայթուցիկ փնտրելու դետեկտորով, որից հետո միայն սկսվել է 6-րդ դատական նիստը:

Սպասվում էր, որ դատական նիստի ժամանակ պարզ կդառնա Սամասթի պատժաչափը: Քանի որ հանցագործության պահին Սամասթի 18 տարին բոլորած չի եղել, նրա գործը քննվում է առանձին թղթապանակի շրջանակներում՝ մյուս մեղադրյալներից զատ: Սակայն դատարանը, ընդունելով Սամասթի դատապաշտպանի` Սամասթի վերջին պաշտպանական ճառի համար ժամանակ տրամադրելու պահանջը, դատական նիստը հետաձգեց մինչև հուլիսի 25-ը:

Նախորդ դատական նիստի ժամանակ հանրապետական դատախազը մեղադրական ճառում Օգյուն Սամասթի համար դատարանից պահանջել է «մարդասպանության» համար սահմանված ցմահ ազատազրկում, սակայն հանցագործության պահին անչափահաս լինելու պատճառով պահանջել է նվազեցնել պատիժը:

http://trt.net.tr/Haber/HaberDetay.aspx?HaberKodu=640634e9-c9c1-4a38-8ea4-045ba73089d7