Տեղի ունեցան Քընալը կղզու Սուրբ Գրիգոր Լուսավորիչ եկեղեցու վաքըֆի ընտրությունները

Ինչպես հաղորդում է պոլսահայ «hyetert.blogspot.com»-ը  2011 թ. հունիսի 26-ին Քընալը կղզում տեղի է ունեցել Սուրբ Գրիգոր Լուսավորիչ եկեղեցու վաքըֆի ընտրություններ:

 Ուշագրավ է, որ 360 վավեր քվեների արդյուքում նորընտիր ղեկավար խորհրդի մեծամասնությունը կազմված է երիտասարդներից:

 

Ղեկավար խորհրդի ընտրված անդամներն են.

 

 Լևոն Շադյան

Մանուկ Սարայդար

Կարին Տերողորմիաջըյան

Թամար Նարգիզ

Առնո Հիլքաթ

Հերման Օսգար

Արդա Չինար

Արիս Դեմիրքըրան

Անիտա Օսմե

Ներկայացնում ենք Արեւմտահայոց հարցերի ուսումնասիրության կենտրոնի հարցազրույցը Քընալը կղզու Սուրբ Գրիգոր Լուսավորիչ եկեղեցու վաքըֆի ղեկավար խորհրդի անդամ Արդա Չինարի հետ:

 -Պարոն Չինար, մի փոքր պատմեք Քընալը կղզու Սուրբ Գրիգոր Լուսավորիչ եկեղեցու մասին, ե՞րբ է կառուցվել:

 -Եկեղեցին կառուցել են մեր նախնիները  1856 թ. վերջին: Եկեղեցին տարվա մեջ միայն չորս ամիս է բաց, այդ ընթացքում, փառք տիրոջը, յուրաքանչյուր կիրակի եկեղեցին լեփ-լեցուն է լինում կղզիաբնակ մեր հավատացյալ ժողովրդով: Եկեղեցին բաց է միայն 4 ամիս, որովհետև հոկտեմբերից սկսած կղզին դատարկվում է: Քընալը կղզին հայկական թաղամաս է, պոլսահայության համար ամառանոց է հանդիսանում:

 -Ուշագրավ է, որ վաքըֆի ղեկավար խորհրդի անդամների մեծ մասը երիտասարդներ են, կարելի՞ է ասել, որ այսօր պոլսահայ երիտասարդներն ակտիվորեն ներգրավված են համայնքայի կյանքին:

 -Դժբախտաբար վստահորեն չեմ կարող ասել, որ մեր երիտասարդները մեծ ցանկությամբ ակտիվ մասնակցություն են ցուցաբերում այս կարևոր գործին: Սակայն այս տարվա ընտրությունների ժամանակ մեծ թվով երիտասարդներ ընտրվեցին և, թերևս, սա հուսադրող է ապագայի համար: Պարտավոր ենք այնպես անել, որ այս սերունդն ավելի հետաքրքրված լինի նմանատիպ հարցերով: Պետք է երիտասարդների թիվը ոչ թե 5 կամ 10 լինի, այլ 50-60:  Ահա այդ օրը կշենանան մեր եկեղեցիները, դպրոցներն ու պոլսահայ համայնքը:

 -Որո՞նք են ձե հետագա քայլերը, ինչ ծրագրեր ունեք ապագայի համար:

 

-Առաջին փուլում պետք է աշխատենք մեր երիտասարդներին հավաքել մեր այս փոքրիկ եկեղեցու շուրջ: Շատ ենք կարևորում, որ ապագա սերունդները ներգրավվեն հայության և հայապահպանության գործում:

  

Այս ամռան ամիսներին մեր հայ պատանիներն ու երիտասարդները կղզում շատ են: Պետք է ամեն հարմար առիթով նրանց կարողանանք համախմբել եկեղեցու շուրջ: Բացի այյդ՝ պետք է ստեղծենք թատերախումբ ու պարախումբ, որոնք ամռան վերջում պետք է  բեմ բարձրանան:

 

Պետք է այնպես անել, որ եկեղեցի այցելեն ոչ միայն կիրակի օրերին` պատարագին, այլև կազմակերպել բանախոսություններ, որպեսզի ամեն օր հաճախեն: 

  

Բացի այդ՝ երիտասարդներին համախմբելու համար նաև բնության գրկում կամ էլ ռեստորաններում ամիսը մեկ անգամ կարելի է ճաշկերույթ կազմակերպել:

 

 -Սուրբ Գրիգոր Լուսավորիչ եկեղեցին ունի՞ որևէ իրավական խնդիր:

 

-Քընալը կղզին տարբեր է մյուս թաղամասերից, պետության հետ կապված որևէ իրավական խնդիր չկա:

 

-Ամեն տարի Քընալը կղզում Քարագյոզյան դպրոցը ամառային ճամբարներ է կազմակերպում երեխաների համար, այս տարի է՞լ է լինելու:

 

-Այո’, Քարագյոզյան վաքըֆն արդեն առողջարան ունի, և ամեն տարի մեր հայ պատանիներն իրենց ամառային հանգիստն այստեղ են անցկացնում: Լինելով Քընալը կղզու Գրիգոր Լուսավորիչ եկեղեցու վաքըֆի ղեկավար խորհրդի անդամներ` մենք էլ անում ենք մեր ձեռքից եկածը՝ օգնություն ցուցաբերելու համար:

 

-Ճամբարներում հայ երեխաներին ու պատանիներին սովորեցնում են նաև հայերեն գրել ու կարդալ, գիտենք որ մասնակցում են նաև իսլամացած, քրդացած հայ ընտանիքների երեխաները, շա՞տ է նրանց թիվը:

 

-Շատ չեն, բայց կան, և եթե տերը կամենա, ցանկանում ենք մեր այս երեխաների համար ընդհանուր մկրտություն կազմակերպել: Մեր եկեղեցու այգում մկրտության ավազան ունենք, որի նմանը չկա Պոլսում:

 

Աշխատում ենք ճշտել մեր այդ երեխաների թիվը, կարծեմ մոտ 25-30 պետք է լինի: Եթե նայենք վերջին տարիների ընդհանուր քաղաքականությանը, մեր այդ իսլամացած, կրթված ընտանքիքները շատ ավելի մեծ թվով են մեջտեղ գալու:

 

-Իսկ այդ երեխաները հե՞շտ են ինտեգրվում հայ համայնքին, ինչպե՞ս են նրանց ընկալում ճամբարի մյուս երեխաները:

 

-Բնավ որևէ խնդիր չկա: Բոլո երեխաները ուս ուսի, ձեռք ձեռքի տված մեծ հաճույքով անց են կացնում իրենց ամառը:

 

-Շնորհակալ ենք հարցազրույցի համար, մաղթում ենք, որ Աստծո հաջողությամբ ավարտին հասցնեք ձեր բոլոր ծրագրերը:

 

-Ես շատ շնորհակալ եմ այս առիթի և Ձեր բաեմաղթանքների համար:

 

Հարցազրույցը վարեց Անահիտ Քարտաշյանը