Օգոստոսի 15-ին վերաբերող սպառնալիք` Թուրքական վրեժխնդրության բրիգադից

Թուրքական վրեժխնդրության բրիգադից «Էվրենսել» թերթին ուղարկված սպառնալիքներ պարունակող նամակում հաղորդվել է, թե քրդերը, հայերը, «Ակօս» և «Էվրենսել» թերթերի աշխատողները, ինչպես նաև` այնպիսի անձինք, ինչպիսիք են Բասքըն Օրանը, Սեբահաթ Թունջելը, Ահմեդ Թյուրքը, եթե մինչև սույն թվականի օգոստոսի 15-ը չլքեն Թուրքիան, արյունոտ գործողություններ են կատարվելու նրանց դեմ:

Թուրքական վրեժխնդրության բրիգադ (Türk İntikam Tugayı (TİT)) կազմակերպության ստորագրությամբ սպառնալիքներ պարունակող նամակ է ուղարկվել «Էվրենսել» թերթին: «Բաց նամակ» վերնագրով հղված գրության մեջ ասվում է, որ «եթե մինչև օգոստոսի 15-ը իրենց պահանջները չիրականացվեն, Դիարբեքիրում ու Ստամբուլում արյունոտ գործողություններ են կատարվելու»: Ինչ վերաբերում է Թուրքական վրեժխնդրության բրիգադի պահանջներին, ապա այս կազմակերպության անդամները պահանջում են, որ քրդերը, հայերը, ինչպես նաև` այնպիսի դեմոկրատ մտավորականներ, ինչպիսիք են Բասքըն Օրանը, Սեբահաթ Թունջելը, լքեն Թուրքիան և դրա մասին ծանուցեն մամուլում:

Թուրքական վրեժխնդրության բրիգադը գրում է. «Դուք, որպես «Էվրենսել» թերթի աշխատակիցներ, ձեր տպագրած հրապարակումներում թուրքերին և մեծ թուրքական պետությանը վիրավորական գրություններ հրապարակելով` ավելացնում եք սխալները: Այդ պատճառով էլ գործողություններ ձեռնարկելու մեր իրավունքը գաղտնի ենք պահում»: Կազմակերպության պահանջները հետևյալն են.

1. «Մինչև օգոստոսի 15-ը դուք և ձեզ հետ համագործակցողները լքելու են թուրքական հողը և այդ մասին ծանուցելու մամուլում:
2. ՊԿԿ-ի պատգամավոր եղող կամ էլ չեղող համակիրներն ու մարտիկները ևս մինչև նշված ամսաթիվը լքելու են թուրքական տարածքները:
3. Հայկական սփյուռքը որևէ պահանջով հանդես չի գալու, իսկ վերջինիս կողմնակիցներն էլ անվերադարձ լքելու են թուրքական հողերը:
4. «Ակօս» շաբաթաթերթը և իրեն համախոհ մամլո օրգանները փակվելու են, և թերթերի խմբագրությունները` աշխատակիցների հետ մեկտեղ, հեռանալու են թուրքական տարածքներից:
5. Փակվելու են Խաղաղություն և ժողովրդավարություն կուսակցության շենքերը, և այս կուսակցության կողմնակիցները լքելու են թուրքական հողը:
6. Մինչև նշված ամսաթիվը թուրքական տարածքից անվերադարձ հեռանալու են նաև Բասքըն Օրանը, Սեբահաթ Թունջելը, Օսման Բայդեմիրը, Ահմեդ Թյուրքը, Էթյեն Մահչուփյանը և մյուսները»:

Նամակը շարունակվում է հետևյալ արտահայտություններով. «Հաղորդում ենք, որ մինչև 2011 թ. օգոստոսի 15-ը վերոնշյալ պահանջների չիրագործվելու դեպքում ՊԿԿ-ի առաջին գործողության տարելիցին գործողություններ ենք իրականացնելու Դիարբեքիրի այն վայրում, որտեղ քրդական հոծ բնակչություն կա, և որ ծանր կորուստներ ենք պատճառելու թշնամի տարրերին, դարձյալ նույն օրը` օգոստոսի 15-ին, գործողություններ ենք ձեռնարկելու Ստամբուլում հայկական տարրի դեմ և թշնամի հպատակներին զրկելու ազդեցությունից… Որպես Թուրքական վրեժխնդրության բրիգադ, մեր ակտիվ գործողությունները շարունակելով հանդերձ, նախազգուշացնում ենք վերջին անգամ: Մեր պայքարը շարունակվելու է այնքան, քանի դեռ մտավորականի ինքնության տակ թաքնված հայրենիքի դավաճանները և թուրքի թշնամիները չեն վերացել մեջտեղից»:

Այս նամակը մեկնաբանած «Էվրենսել» թերթի խմբագիր Ֆաթիհ Փոլաթը նշեց. «Թեև վստահ ենք, որ ընտրվածներին պատգամավորության մանդատներից զրկելու հարցում այդքան ջանասիրություն ցուցաբերած դատախազները նույն փութաջանությունը չեն ցուցաբերի մեզ ուղղված սպառնալիքների կապակցությամբ հետաքննություն սկսելու հարցում, բայց և այնպես կոչ ենք անում դատախազներին` կատարել իրենց պաշտոնից բխող պարտականությունը»:

«Բիանեթ» թուրքական լրատվամիջոցը հաղորդում է Ստամբուլից

24.06.2011

http://www.bianet.org/bianet/diger/130987-titden-15-agustos-tehdidi