Ճգնաժամ Թուրքիայում. քուրդ պատգամավորները հնարավոր է՝ բոյկոտեն խորհրդարանի աշխատանքները

Խաղաղություն և ժողովրդավարություն քրդամետ կուսակցության աջակցությունը վայելող Հաթիփ Դիջլեին պատգամավորական մանդատից զրկելու մասին Թուրքիայի Բարձրագույն ընտրական խորհրդի (ԲԸԽ) որոշումը հնարավոր է` նոր ճգնաժամ առաջ բերի Թուրքիայի ներքաղաքական կյանքում։

Թուրքական լրատվամիջոցներում շրջանառվող լուրերի համաձայն՝ Խաղաղություն և ժողովրդավարություն քրդամետ կուսակցությունը, որը նոր գումարման խորհրդարանում զբաղեցնում է 35 տեղ (նախքան Հաթիփ Դիջլեի վերաբերյալ կայացված որոշումը՝ 36 տեղ), հնարավոր է՝ բոյկոտի Թուրքիայի Ազգային մեծ ժողովի աշխատանքները։

«Ֆըրաթ» գործակալության փոխանցմամբ՝ քրդական Ժողովրդավարական հասարակության կոնգրեսը Խաղաղություն և ժողովրդավարություն կուսակցությանը կոչ է արել բոյկոտել և չմտնել խորհրդարան։

Ստեղծված իրավիճակում ինչպես թուրքական, այնպես էլ միջազգային լրատվամիջոցները փորձում են կանխատեսումներ անել այն իրավիճակի առնչությամբ, որն առաջանալու է քուրդ պատգամավորների կողմից նոր գումարման խորհրդարանի աշխատանքները բոյկոտելու մասին սպասվող որոշումից հետո։

Մասնավորապես, Reuters գործակալությունը նշում է, որ եթե քուրդ պատգամավորները որոշեն բոյկոտել խորհրդարանի աշխատանքները, տեղի կունենան միջանկյալ ընտրություններ։

«Թուրքիան դեմ-հանդիման է կանգնած քուրդ պատգամավորների՝ խորհրդարանի աշխատանքները բոյկոտելու որոշմանը։ Եթե 550–տեղանոց թուրքական խորհրդարանում 28–ից ավելի պատգամավորներ կամ խորհրդարանի 5%–ը միասնաբար հրաժարական տա, ապա օրակարգում հայտնվելու է միջանկյալ ընտրություններ անցկացնելու հարցը»,– գրում է Reuters–ը։

Սակայն թուրքական «Միլլիյեթ» օրաթերթը գրում է, որ գոյություն չունի որևէ օրենք, որին ստեղծված իրավիճակի առնչությամբ հնարավոր լիներ հղում կատարել։

«Ի՞նչ կլինի, եթե 35 անկախ պատգամավորները երդում չտան և չմտնեն խորհրդարան։ Առայժմ այս հարցն անորոշ է, քանի որ դրա վերաբերյալ չկա որևէ օրենք կամ դրույթ խորհրդարանի կանոնակարգում։ Իսկ խնդրի լուծման համար «ճանապարհային քարտեզը» կստեղծվի խորհրդարանի ղեկավար կազմի որոշումների հիման վրա»,– գրում է թուրքական պարբերականը։

Ինչպես ավելի վաղ տեղեկացրել էինք, ԲԸԽ–ի որոշմամբ պատգամավորական մանդատից զրկվել է Խաղաղություն և ժողովրդավարություն քրդամետ կուսակցության աջակցությունը վայելող Հաթիփ Դիջլեն։ ԲԸԽ–ն իր որոշումը հիմնավորել է այն բանով, որ նախքան ընտրությունները Քրդստանի համայնքների միության (KCK) (համարվում է Քրդստանի բանվորական կուսակցության (PKK) ճյուղերից մեկը) դեմ իրականացվող հետաքննության շրջանակում կալանավորված Հաթիփ Դիջլեն դատարանի կողմից «ահաբեկչական կազմակերպության քարոզչությամբ զբաղվելու» մեղադրանքով դատապարտվել էր 1 տարի 8 ամսվա ազատազրկման։

Թուրքիայի նոր գումարման խորհրդարանում քուրդ գործչի թափուր աթոռը կզբաղեցնի Թուրքիայի վարչապետ Ռեջեփ Թայիփ Էրդողանի գլխավորած Արդարություն և զարգացում իշխող կուսակցության ներկայացուցիչը։

22.06.11

Tert.am