Թալաս գավառի Ալի լեռան տակ գտնվող քաղաքը բացվել է տեղացի և օտարերկրացի զբոսաշրջիկների առաջ

Թուրքիայի Էներգետիկայի և բնական պաշարների նախարար Թաներ Յըլդըզը զբոսաշրջիկների առաջ բացեց Կեսարիայի Թալաս գավառում գտնվող Ալի լեռան տակ գտնվող ստորգետնյա քաղաքը:

Թուրքիայի Էներգետիկայի և բնական պաշարների նախարար Թաներ Յըլդըզը զբոսաշրջիկների առաջ բացեց Կեսարիայի Թալաս գավառում գտնվող Ալի լեռան տակ գտնվող ստորգետնյա քաղաքը: Նախարար Թաներ Յըլդըզը մասնակցեց այն ստորգետնյա քաղաքի բացման արարողությանը, որը 2005 թ. հայտնագործվել էր, մաքրվել ու լուսավորվել Թալասի քաղաքապետարանի կողմից: Անցյալ տարի ավարտին էին հասցվել քաղաքի չափագրական և պատկերավորման աշխատանքները, և այն այցելությունների համար պատշաճ վիճակի էր հասցվել:

Բացման արարողության ժամանակ ելույթ ունեցած նախարար Յըլդըզը նշեց, թե հունիսի 12-ի ընտրություններին Թալասի բնակչությունն էլ է նպաստել Թուրքիայի կայունությանը: Յըլդըզը հայտնելով, որ գավառի բնակչության այդ նպաստն ինքը համարում է կարևոր քայլ` ուղղված Թուրքիայի և Կեսարիայի զարգացմանը, ասաց. «Թուրքիայի հատկապես պատմական ու մշակութային հարստություններն անընդհատ աչքաթող էին արվում: 1996-2000 թթ. ընթացքում Թուրքիայում վերանորոգվել է 56 հուշարձան: Միայն Կեսարիայում 2002-2011 թթ. ընթացքում վերականգնվել է 240 հուշարձան: Աղբյուրների ավելացմանը և Թուրքիայում կայունության ամրապնդմանը զուգահեռ` կարողանում ենք ավելի մեծ դրամական հատկացումներ տրամադրել մեր մշակութային հարստությունների համար: Կեսարիայում մեր կողմից հատկացված միջոցները կազմել են 33 միլիոն լիրա: 1996-2002 թթ. այդչափ գումար հատկացվում էր գրեթե ողջ Թուրքիային: Մեր մշակույթի նախարարության հետ մեկտեղ շատ էական զարգացումներ գրանցեցինք` Թուրքիայում մեր ունեցած մշակութային հարուստ ժառանգությունը մեջտեղ հանելու ուղղությամբ»:  

Յըլդըզը նշեց, որ Կեսարիան` իր գավառների հետ մեկտեղ, այսուհետ նշանավորվելու է ոչ միայն որպես արդյունաբերական և քաղաքական ու մարզական իրադարձություններով հարուստ քաղաք, այլ նաև` քաղաք, որն ունի պատմական և մշակութային հարստություններ:  

Կեսարիայի քաղաքապետ Մեհմեդ Օզհասեքին էլ իր հերթին հայտնեց, որ իր` քաղաքապետի պաշտոնում նշանակվելու օրից ի վեր իրենք զբաղվել են քաղաքի ենթակառուցվածքային ծառայություններով, դրանք ավարտին հասցնելուց հետո սկսել են հսկայական նախագծեր իրականացնել և արդեն աշխատում են հաճույք պատճառող նախագծերի վրա: Նա նաև հավելեց, թե իրենք վերականգնել են քաղաքի պատմական տեսքը, և որ պատմական գավառներից Թալասն ապագայում գլխավորելու է սպասարկման ոլորտից շահույթ ապահովող գավառները:

Թալասի քաղաքապետ Ռըֆաթ Յըլդըրըմն էլ նշեց, որ Ալի լեռան տակ գտնվող քաղաքի մասին հաճախ էր խոսվում, սակայն ոչ ոք կոնկրետ քայլեր չէր ձեռնարկում քաղաքի վերականգնման ուղղությամբ` հանուն գավառի բարօրության: Յըլդըրըմն ասաց, որ նախարարության և Կեսարիայի քաղաքապետարանի աջակցությամբ իրենք ներկայում ապրում են այս ստորգետնյա քաղաքը զբոսաշրջիկների առաջ բացելու հպարտությունը, քաղաք, որի պատմությունը ձգվում է 700 տարուց ավելի, և որն ունի նաև ջրամբար:

Քաղաքապետ Յըլդըրըմը նաև հանդես եկավ հետևյալ տեղեկություններով. «Մեր գավառի ամենակարևոր առանձնահատկությունը հանդուժողականության կենտրոն լինելն է: Մուսուլմանները, հույներն ու հայերը տարիներ շարունակ ապրել են իրար մեջ: Ներկայում տեսնում ենք, որ կանգուն մնացած հունական ու հայկական եկեղեցիները և մզկիթները կողք կողքի են: Մեր ուժերի ներածին չափով շարունակելու ենք աշխատել, որ մեր գավառը դառնա զբոսաշրջության կենտրոն»:

Հնչած ելույթներից հետո ստորգետնյա քաղաքը բացվեց նախարար Յըլդըզի և Արդարություն ու զարգացում կուսակցության` Կեսարիայի պատգամավորների կողմից: Նախարար Յըլդըզն ու հրավիրվածները, ստորգետնյա քաղաքում շրջելով, տեղեկություններ ստացան քաղաքապետ Ռըֆաթ Յըլդըրըմից:

Ջիհան լրատվական գործակալություն

22.06.2011