Սուրբ Փրկիչ հիվանդանոցի «հրաշքները»

Սահակ Գյուրյան

Արդեն 15 տարի Սուրբ Փրկիչ հիվանդանոցում աշխատող բժիշկ Սարգիս Սերոբը, վիճակագրական տվյալներ բերելով, բացատրում է, որ ակնաբուժության ծառայություններից օգտվողների թվում նշանակալի աճ է նկատվել. «Նախանցած տարի 4 հազար հիվանդի եմ զննել: Անցյալ տարի իմ կողմից ստուգված հիվանդների թիվը հասել է 11 հազարի, իսկ մեր հիվանդանոցում բուժվածների ընդհանուր թիվը մոտ 25 հազար է եղել»:

Թուրքիայում հաշված հիվանդանոցներում կատարվող և վաղ հասակում չախտորոշվելու դեպքում երեխաների կուրությանը տեղիք տվող հիվանդության վիրահատությունը, արդեն որոշ ժամանակ է, ինչ հաջողությամբ իրականացվում է Սուրբ Փրկիչ հիվանդանոցում: Հիվանդանոցն ապաքինում է նաև տեսողության ունակությունը կորցրածներին: Բացի այդ՝ սույն հիվանդանոցի անունն անցյալ տարի գրանցվել է բժշկական գրականության մեջ` քաղցկեղով մի հիվանդի հաջող վիրահատության շնորհիվ:

Չտեսնողների ապավենը

Սուրբ Փրկիչ հիվանդանոցի հիմնական «հրաշքը» տեսողության ունակությունը կորցրածներին տեսողությունը վերադարձնելն է: 2008 թ. ազատազրկված և բանտում շաքարային դիաբետ հիվանդության պատճառով զույգ աչքով կուրացած Հասան Քարաբայը բոլոր բժիշկներից, ում դիմել է, ստացել է «Ոչինչ հնարավոր չէ անել» պատասխանը: Երբ այլևս հուսահատվելու վրա է եղել, Քարաբայի ճանապարհը հատվել է Սուրբ Փրկիչ հիվանդանոցին, և այստեղ վիրահատության է ենթարկվել բժիշկներ Հյուսեին Յեթիքի և Սարգիս Սերոբի կողմից, և հիմա Քարաբայի երկու աչքի տեսողությունն էլ վերականգնված է: Քուրթուլուշում (հայաշատ թաղամաս Ստամբուլում-Ակունքի խմբ.) խանութ ունեցող Նիզամեթթին Չընարը նույնպես նշյալ հիվանդանոցում տեսողությունը վերականգնած հիվանդներից է:

Ուշադի’ր եղեք վաղաժամ ծնունդների նկատմամբ

Սերոբը նշելով, թե իրենց հիվանդանոցում հաջողությամբ են իրականացվում Թուրքիայում հազվադեպ կատարվող վիրահատություններ, հայտնում է նաև, որ վաղաժամ ծնվող երեխաների դեպքում արվող ՌՕԲ հիվանդության վիրահատության համար դիմումներ են ստացվում թե’ երկրի ներսից և թե’ արտերկրից: ՌՕԲ հիվանդությունն առաջանում է հատկապես 28 շաբաթից վաղ կամ արհեստական բեղմնավորմամբ ծնված երեխաների մոտ` եղջերաթաղանթի ոչ բավարար ձևավորման արդյունքում: Մոր արգանդում առանց թթվածնի միջավայրում զարգացող եղջերաթաղանթը նորածին երեխաներին անմիջապես թթվածին չտրվելու պատճառով չի կարողանում նորմալ զարգանալ: Եթե առաջին 72 ժամվա մեջ չմիջամտեն, երեխան կարող է մեկ-երկու շաբաթվա ընթացքում կուրանալ: ՌՕԲ հիվանդության օպերացիայի ժամանակ լազերով մաքրվում է եղջերաթաղանթի պատռված հատվածը:

Նոր դարաշրջանի սկիզբ դրած մեթոդը

Աշխարհում առաջին անգամ Սուրբ Փրկիչ հիվանդանոցում կիրառված մեթոդով ստնտավորների հաստ աղիքի ստորին հատվածի քաղցկեղի դեմ պորտի մեջ բացված մեկ ծակով չորս վիրահատություն է կատարվել:

Բժիշկ Արիֆ Սամի Քահյան հետևյալ կերպ բացատրեց իրականացվող վիրահատությունների կարևորությունը. «Խոսքը գնում է փակ մեթոդով պորտի մեջ մեկ բացվածքով հաստ աղիքի ստորին հատվածում կատարվող վիրահատության մասին: Մինչ այդ ողջ պորտի երկայնքով արված բացվածքով իրականացվող վիրահատության դեպքում ռիսկը շատ մեծ էր լինում. հիվանդը ցավ էր քաշում, շնչառությունը դժվարանում էր, վերքը կարող էր արյունահոսել, և բարդություններ էին առաջանում: Այս վիրահատությունը հետագայում արվել է 4 կամ 5 բացվածքով: Այժմյան ամենամեծ առավելությունն այն է, որ ոչ մի սպի չի մնում: Եվ ամենակարևորը` այս վիրահատությունը ցույց տվեց, որ մյուս քաղցկեղների դեմ արվող վիրահատությունների դեպքում ևս այն կարող է կիրառվել»:

Ակօս

Թիվ` 793