Հայաստանի հետ պետք է բանակցել առանց նախապայմանների. թուրք կուսակցապետի սենսացիոն հայտարարությունը

Թուրքիայի գլխավոր ընդդիմադիր Ժողովրդահանրապետական (CHP) կուսակցության առաջնորդ Քեմալ Քըլըչդարօղլուն հայ, թուրք եւ ամերիկացի լրագրողների հետ հանդիպմանը սենսացիոն հայտարարություն է արել։

Թուրքական Hurriyet Daily News-ի փոխանցմամբ՝ հանդիպման ժամանակ ամերիկացի լրագրողը նկատել է, որ թե իշխող կուսակցությունը, թե ընդդիմադիր Ժողովրդահանրապետականը Հայաստանի հետ հարաբերությունների կարգավորման վերաբերյալ ունեն նույն դիրքորոշումը, քանի որ նախապայման են բերում Ղարաբաղից հայկական ուժերի դուրսբերումը։

Քեմալ Քըլըչդարօղլուն պատասխանել է, թե իրենք կողմ են Հայաստանի հետ հարաբերությունների կարգավորմանն առանց նախապայմանների։

Իսկ կուսակցության փոխնախագահ Օսման Քորութուրքը նշել է, թե իրենց տարբերությունը իշխող կուսակցությունից այն է, որ իրենք Ղարաբաղից հայկական զորքերի դուրսբերումը ոչ թե նախապայման են համարում, այլ ուղղակի բարի կամք Հայաստանի կողմից։

Նշենք, որ այս հայտարարությունը սենսացիոն է, քանի որ երբ ստորագրվեցին հայ-թուրքական արձանագրությունները, խորհրդարանական երկու կուսակցություններ՝ Ժողովրդահանրապետական եւ Ազգայնական շարժում կուսակցությունները դեմ են եղել։

«Ժողովրդա-հանրապետականե կուսակցությունում մեծ փոփոխություններ տեղի ունեցան, երբ սեքս սկանդալի պատճառով հրաժարական տվեց կուսակցության առաջնորդ Դենիզ Բայկալը եւ նոր նախագահ դարձավ Քեմալ Քըլըչդարօղլուն։

Քեմալ Քըլըչդարօղլուն մեկ տարվա ընթացքում կուսակցության ղեկավար խորհրդի կազմից եւ պատգամավորության ցուցակներից դուրս թողեց ազգայնամոլական կուսակիցներին, որոնց մեջ էին երդվյալ հակահայ Օնուր Օյմենն ու Ջանան Արըթմանը։

Այն խոսակցություններին, թե Քըլըչդարօղլուի մայրը հայ է, նա պատասխանել է, թե կարող է եւ հայ է։ Իշխող կուսակցության անդամները նրա մոր հայ լինելը փորձում են բացասական ֆոնի վրա ներկայացնել՝ նպատակ ունենալով հարվածել նրա վարկանիշին։

http://news.am/arm/news/64183.html