Մնձուրում՝ Դերսիմ-Երևան եղբայրությունը

Մնձուրի բնության և մշակույթի փառատոնը, որն առաջին անգամ մեծ ոգևորությամբ կազմակերպվել է 2000 թ., այս տարի աննախադեպ հուզմունքով է իրականացվելու: Այս տարվա փառատոնին հայեր են հրավիրված Երևանից և աշխարհի տարբեր երկրներից, և 100-ից ավել հայեր իրենց ավտոշարասյուններով կմասնակցեն փառատոնին:  

Այս տարի արդեն 11-րդ անգամ կազմակերպվող Մնձուրի բնության և մշակույթի փառատոնից առաջ Ստամբուլում գտնվող Դերսիմահայերի դավանանքի և սոցիալական փոխօգնության միության ղեկավարության նախաձեռնությամբ փառատոնին են հրավիրվել Երևանում, ինչպես նաև` Ֆրանսիայի և Գերմանիայի պես երկրներում բնակվող հայերը, և այս հրավերները մի նոր ոգևորություն են հաղորդել փառատոնին:

Միության նախագահ Միհրան Փրկիչ Գյուլթեքինը Երևան կատարած այցի ժամանակ այնտեղի հայ քաղաքացիների հետ կայացած հանդիպումից հետո մեկնարկած աշխատանքների շնորհիվ օրակարգային է դարձրել արմատներով դերսիմցի տասնյակ անձանց` իրենց պապերի ապրած տարածքն այցելելու հարցը, դերսիմցիներ, ովքեր հակադրված են եղել գաղթել այնտեղից:

Երկար ժամանակ Ֆրանսիայի, Գերմանիայի և Հայաստանի որոշ միությունների և առաջադեմ անձանց հետ կատարված աշխատանքներն արդյունավետ են եղել, և հաստատվել է, որ առայժմ մոտ 100 հայ քաղաքացի կմասնակցի փառատոնին: Դերսիմում կատարվում են հյուրերին տեղավորելու պայմաններ ստեղծելու համար անհրաժեշտ նախապատրաստական աշխատանքները: Նախատեսվում է, որ հուլիսի վերջին սպասվող փառատոնին խաղաղության և եղբայրության ուղերձներ կհղվեն հայերենով, զազայերենով ու թուրքերենով:

Հրավիրյալների շարքում են բազմաթիվ հայ արվեստագետներ` Հայկական ժողովրդական պարերի համույթի գլխավորությամբ, իսկ ծրագրով նախատեսվում են այցեր դեպի Մնձուրի ակնաղբյուրները, Խոզաթի հայկական եկեղեցին և Նազիմիյեում գտնվող ջրվեժները:

Դերսիմ-Երևան եղբայրությունը

Գյուլթեքինը նշելով, թե այս զարգացումը նաև Հրանտ Դինքի երազանքն է եղել, հայտնեց, որ իրենք Մեթին Քահրամանի և Դերսիմի քաղաքապետ Էդիբե Շահինի միջնորդությամբ հանդիպել են նահանգապետի հետ, և որ վերջինս դրական է տրամադրվել այս միջոցառմանը, ինչպես նաև` խոսք է տվել միջոցառման կայացման համար աշխատանքներ սկսել` հարմար պայմաններ ստեղծելու ուղղությամբ: Բացի այդ՝ Գյուլթեքինն ասաց, թե իրենք փառատոնի կոմիտեին կոչ են անելու այս տարվա փառատոնը նվիրել Հրանտ Դինքի հիշատակին:

Գյուլթեքինը շեշտելով, որ իրենք կազմակերչական աշխատանքներ սկսում են Դերսիմի քաղաքապետարանի նախաձեռնությամբ կազմակերպվելիք փառատոնի շրջանակներում մի բաղձանքի իրականացման երազանքով, նաև նշեց. «Այս տարի Դերսիմում նախատեսվող Մնձուրի բնության և մշակույթի փառատոնին մեր միության կողմից որպես հրավիրյալներ մասնակցող 100-ի չափ հայաստանցիները մեր հյուրերն են լինելու, ամենայն հավանականությամբ հրավիրյալի կարգավիճակում չգտնվող մյուս անձանց շնորհիվ փառատոնի մասնակիցների թիվը կհասնի 200-ի: Հուսով ենք, որ եվրոպական երկրներից և ԱՄՆ-ից գալիք դերսիմահայերի շնորհիվ այդ թիվն ավելի կմեծանա: Հենց այդ էր երազում բազմաթիվ գեղեցիկ հույսերի իրագործման համար իր կյանքով փոխհատուցած սիրելի Հրանտը. այս հողերում տեղի է կունենան եղբայրացում և գիրկընդխառնում: Դրա հուզմունքն ապրելն էլ մեզ է վիճակվել: Բոլորի աջակցություն ենք հայտնում փառատոնը Հրանտ Դինքի հիշատակին նվիրելու հարցում միաբանվելու և տեղական իշխանություններին դա հաղորդելու գործում: Կարծում եմ, որ այդպիսով փառատոնն ավելի իմաստավորված կլինի: Նույնիսկ ավելի առաջ գնալով` ուզում եմ, որ Դերսիմն և Երևանը հռչակվեն քույր քաղաքներ, որովհետև այս փառատոնն առիթ կլինի, որ այս երկու ժողովուրդների միջև անցյալում ապրված ցավերը, թեկուզ և քիչ, բայց ամոքվեն, և սիրով ու հարգանքով ոգեկոչվեն երկու ժողովուրդների կողմից:  Ով գիտի, գուցե և Երևանից եկող մեր հայ եղբայրները ևս, ի նշան Ցեղասպանության դեպքերի ժամանակ հայերին գլխավոր օթևանը լինելու պարտականությունն ստանձնած Դերսիմի հանդեպ սիրո արտահայտության, կգրկախառնվեն դերսիմցիների հետ: Դերսիմցի քուրդ քըզըլբաշ եղբայրներն էլ, նրանց սիրով գրկելով, թեկուզ և ոչ իրենց, այլ իրենց պապերի սխալի համար ներում հայցելով, Մնձուրի ակնաղբյուրների շուրջ առաջվա պես շուրջպար կբռնեն հայ եղբայրների հետ. ինչո՞ւ ոչ, չէ՞ որ դրան երկու եղբայրական ժողովուրդներն էլ պատրաստ են»:

Ռավին Սթերք

Ֆըրաթ լրատվական գործակալություն

19.06.2011