Անգլիան փորփրում է Հայկական հարցը

Երեկ Լորդերի պալատում կայացած նիստում քննարկվել են 1915 թ. Հայոց ցեղասպանության պնդումները:

Ցեղասպանության ճանաչման կերպը կմեծացնի լարվածությունը

Անգլիայի խորհրդարանի վերին պալատը հանդիսացող Լորդերի պալատում երեկ  կայացած նիստում քննարկվել են 1915 թ. Հայոց ցեղասպանության պնդումները: Պահպանողական կուսակցության անդամ, Հայաստանի հետ բարեկամության խմբի նախագահի տեղակալ, բարոնես Շրելլա Ֆլեյթերը, խորհրդարանին հարցապնդում է հղել այն մասին, թե բրիտանական կառավարությունը ե՞րբ է պատրաստվում ճանաչել Հայոց ցեղասպանությունը: Լորդերի պալատում Հայաստանի հետ բարեկամության խմբի նախագահի տեղակալ  բարոնես Շրելլա Ֆլեյթերի կողմից ներկայացված սույն հարցապնդումից հետո բարոնես Բուֆրոյդի, լորդ Էվըբարիի, Չեսթերի եպիսկոպոս, լորդ Թոմլինսոնի և Մեծ Բրիտանիա-Հայաստան միջխորհրդարանային բարեկամական խմբի նախագահ, բարոնես Քոքսի մասնակցությամբ տեղի ունեցան 1915 թ. դեպքերի վերաբերյալ հայկական պնդումների (Հայոց ցեղասպանության-Ակունքի խմբ.) մասին քննարկումներ:

Բարոնես Ֆլեյթերի` Հայոց ցեղասպանության ճանաչման օրացույցի վերաբերյալ կառավարությանը հղած հարցին ի պատասխան` լորդ Գիլդֆորդ Հովելը նշեց. «1915 թ. եղած սարսափելի գործադրումների ժամանակ հազարավոր հայեր են մահացել` մի շարք զինված հարձակումների, սովի և հիվանդությունների պատճառով: Այնուամենայնիվ, կարծում ենք, թե ավելի ճիշտ մոտեցում կլինի, եթե թուրք ու հայ ժողովուրդները միասին ուսումնասիրեն իրենց համատեղ պատմությունը, և աջակցում ենք դրան ուղղված ձեռնարկումները: Թուրք և հայ ժողովուրդները ջանքեր են գործադրում` իրենց հարաբերությունները պայմանագրերի միջոցով բարելավելու, խաղաղության մեջ դրացիական հարաբերություններ հաստատելու ուղղությամբ»: Հովելը նաև շեշտեց, թե «այդ գործընթացին աջակցում է ոչ միայն Անգլիան, այլ նաև ԱՄՆ-ի և Ռուսաստանի պես երկրները, մյուս կողմից էլ Լեռնային Ղարաբաղի խնդրի առնչությամբ շարունակվում են Ռուսաստանի Դաշնության, ԱՄՆ-ի և Ֆրանսիայի մասնակցությամբ սկսված Մինսկի խմբի բանակցությունները, այդ երկու նախաձեռնությունները հուսադրիչ են ապագայի համար, և որ Ցեղասպանության ճանաչման` բարոնես Ֆլեյթերի պատկերացրած կերպն ընդամենը կմեծացնի լարվածությունը»:

Լորդերի պալատում կայացած նիստի ընթացքում կատարված քննարկումներին մասնակցել են նաև Անգլիայի խորհրդարանի առաջին կին խոսնակ, բարոնես Բեթթի Բուֆրոյդը, լորդ Թոմլինսոնը, Մեծ Բրիտանիա-Հայաստան միջխորհրդարանային բարեկամության խմբի նախագահ, նաև` Հումանիտար օգնության հիմնադրամի նախագահ, բարոնես Քերոլայն Քոքսը:

Դողան լրատվական գործակալություն

18.06.2011