Նամըք Դուրուքան
«Աշխատանքի ժողովրդավարություն և խաղաղություն» դաշինքի ցուցակից պատգամավոր ընտրված Էրթուղրուլ Քյուրքչյուն, Սըրրը Սյուրեյյա Օնդերը և Լևենթ Թյուզելը չեն ցանկանում արտասանել երդման մեջ տեղ գտած «Հավատարիմ եմ մնալու Աթաթուրքի սկզբունքներին և կատարած հեղափոխությանը» արտահայտությունը:
Թուրքիայի Ազգային մեծ ժողովում դարձյալ ծայր առավ Լեյլա Զանայի` 20 տարի առաջ քրդերենով արտասանած երդման պատճառով առաջացած ճգնաժամը: Այս անգամ Խաղաղություն և ժողովրդավարություն կուսակցության սատարած «Աշխատանքի ժողովրդավարություն և խաղաղություն» դաշինքի ցուցակից ընտրված սոցիալիստ պատգամավորները չեն ցանկանում արտասանել երդման տեքստում առկա «Հավատարիմ եմ մնալու Աթաթուրքի սկզբունքներին և կատարած հեղափոխությանը» նախադասությունը` առարկելով, թե այն չի համապատասխանում իրենց որդեգրած գաղափարախոսությանը և աշխարհայացքին, և պարունակում է ցեղապաշտական արտահայտություններ: Խաղաղություն և ժողովրդավարություն կուսակցությունը ճգնաժամը հաղթահարելու և իր պատգամավորներին համոզելու համար խնդիրը քննարկում է Դիարբեքիրում կատարվող ժողովում, որը նպատակ ունի պատգամավորների համար համոզիչ բանաձև գտնել:
Զանան ճգնաժամ չի ստեղծի
Վերստին պատգամավոր ընտրված Լեյլա Զանայի` Թուրքիայի Ազգային մեծ ժողովի ամբիոնից քրդերենով արտահայտած այն խոսքերը, թե «Այս երդումն ասում եմ` հանուն թուրք և քուրդ ժողովուրդների եղբայրության», մեծացրել էր քաղաքական լարվածությունը: Լեյլա Զանան, ի պատասխան այն հարցին, թե հունիսի 24-ին նախատեսվող երդման արարողության ժամանակ քրդերենո՞վ է երդվելու, թե՞ ոչ, հայտնեց, որ դա այս ժամանակաշրջանին հարմար չի լինի, և որ ինքը նման մտադրություն չունի:
«Հակասում է սոցիալիզմին»
Սակայն պարզվեց, որ պատգամավորների երդումն ասել չեն ցանկանում Խաղաղություն և ժողովրդավարություն կուսակցության սատարած սոցիալիստ Լևենթ Թյուզելը, Սըրրը Սյուրեյյա Օնդերը և Էրթուղրուլ Քյուրքչյուն: Սոցիալիստական գաղափարներ դավանող այս երեք պատգամավորները հայտարարեցին, թե չեն արտասանելու երդման տեքստը` իրենց առարկությունը հիմնավորելով այն փաստարկով, ըստ որի` տեքստում առկա են ռասիստական արտահայտություններ: Պարզվեց, որ վերոհիշյալ պատգամավորները չեն ընթերցելու երդման տեքստը` վերջինում տեղ գտած «Հավատարիմ եմ մնալու Աթաթուրքի սկզբունքներին և կատարած հեղափոխությանը», «Հավատարմորեն կատարելու եմ սահմանադրության նորմերը» և «Պատվովս եմ երդվում հզոր թուրք ազգի առաջ» արտահայտությունների` իրենց գաղափարների հակասելու պատճառով:
Կուսակցությունը սառն է վերաբերվում
Երեք պատգամավորների` երդումը չընթերցելու մասին հայտարարությունն այսօր քննարկվելու է Դիարբեքիրում նախատեսվող ժողովում: Կուսակցության ղեկավարությունն այն տեսակետին է, թե երդման տեքստը չընթերցելը բացասական իրավիճակ է կառաջացնի և մեծ ճգնաժամի տեղիք կտա: Ինչ վերաբերում է Խաղաղություն և ժողովրդավարություն կուսակցության առաջադրած մյուս պատգամավորներին, ապա պարզվեց, որ վերջիններս աջակցելու են Թյուզելի, Օնդերի և Քյուրքչյուի` երդումը չասելու որոշմանը և կանգնելու այդ երեք պատգամավորների թիկունքին` նմանատիպ հայտարարություններով անելով:
17.06.2011
Միլիեթ
Leave a Reply