Ժողովրդավարական հասարակայնությանը և մամուլին՝ հարգանք դոկտոր, պրոֆեսոր Բասքըն Օրանի կյանքի հանդեպ

Հարգելի Բասքըն Օրանը, տարիներ շարունակ անարդարությունների մասին բարձրաձայնելով, կանգել է անարդարության ենթարկվածների կողքին: Բազմաթիվ վտանգներ աչքի առաջ ունենալով` իրենց կամավոր նախընտրությունները իրավունքն ու արդարությունը դարձրած մյուս մտավորականների նման, որոնց թիվն առանձնապես մեծ չէ, նա նույնպես հարկադրված է եղել դիմագրավել բազմաթիվ վտանգներ: Հարգելի Օրանը եթե անգամ տարբեր է մտածում որոշ հարցերում, սակայն քանի որ իր համերաշխությունն է արտահայտել ցեղասպանության զոհ գնացած կամ ցեղասպանության թիրախ եղող ժողովուրդներին, որոնց իրավունքները ոտնահարվել են ամենակոպիտ կերպով, քաղաքացիական և պաշտոնական ռասիստ շրջանակներն ատում են նրան: Հարգելի Օրանի` «Ռադիկալ» օրաթերթի 2011 թ. հունիսի 12-ին հրապարակած «Պետությունը վախենու՞մ է, թե՞ մտահոգվում» վերնագրով հոդվածը իր դեմ ուղղված հարձակումների սկանդալը և վտանգի չափը ողջ մերկությամբ բացահայտելու տեսանկյունից կրում է ծանուցման բնույթ:

(«Ռադիկալում» տպագրված հիշյալ հոդվածը տե’ս հետևյալ լինքում` http://www.radikal.com.tr/Radikal.aspx?aType=RadikalEklerDetayV3&ArticleID=1052587&Date=14.06.2011&CategoryID=42)    

Իրենց մեջքերը պետական իշխանությանը հենած, ամբարտավան պոտենցիալ մարդասպանները մարդ չեն համարում Բասքըն Օրանին, փորձում են նրան ստորացնել ամենաանմակարդակ հայհոյանքներով ու վիրավորանքներով: Մահվան սպառնալիքներ են ուղղում նրան: Այլ կերպ ասած` «հայացնում են» նրան, նրա հետ խոսում ցեղասպանի լեզվով:

Դրան ի պատասխան` թուրքական արդարադատությունը բացահայտ կերպով երեք կապիկներ է խաղում: Ձևական հետաքննություններով և դատական նիստերով, անվերջանալի բյուրոկրատական քաշքշուքներով ծաղրում է զոհին, աշխատում մոլորեցնել հասարակայնությանը: Մեղմ ասած` անպատիժ է թողնում մարդասպան թեկնածուներին: Պարոն Օրանը արդարադատության կողմից անտեսվելու պատճառով դառնում է մարդասպանների թիրախը:

Այդ վերաբերմունքը մեծ ամոթ է արդարադատության համար: Այն ոչ միայն ամոթ է, այլ նաև շատ վտանգներով հղի մի սկանդալ: Եթե այդ դեպքին անմիջապես չմիջամտեն, պետության գլխին կանգնած իրավասու անձինք (նախագահը, վարչապետը, արդարադատության նախարարը կամ ներքին գործերի նախարարը և նրանց հսկողության տակ գտնվող անվտանգության մարմինները) կդառնան հարգելի Օրանի գլխին գալիք ամեն տեսակի փորձանքների մեղսակիցները:

Մենք ամենայն մանրամասնությամբ հիշում ենք, թե ինչպես է Հրանտ Դինքն անտարբերության մատնվել արդարադատության կողմից, ինչպես են ջանացել նրան միայնակ թողնել, ինչպես է դարձել մարդասպանների թիրախը և ի վերջո` սպանվել: Համաշխարհային հասարակայնության աչքի առաջ է նաև, թե արդարադատության անվան տակ ինչպիսի ամոթալի սկանդալներ են կատարվել և ներկայում էլ շարունակում են տեղի ունենալ:

Այլևս հերի’ք է: Նման մարդասպան ձեռնարկումների դեմ այլևս ոչ սիրտ է մնացել, ոչ էլ համբերություն:

Հարգանք ենք պահանջում Բասքըն Օրանի կյանքի նկատմամբ,

կյանքի անվտանգության երաշխիք` Բասքըն Օրանին:

Verein der Völkermordgegner e.V. Frankfurt / Main

Միություն ընդդեմ ցեղասպանության կազմակերպություն

Ֆրանկֆուրտ, Մայն

Նախագահ` Ալի Էրթեմ

Հեռախոս` 0049/69/5970813

E-Mail: skd@gmx.net