Մեջլիս մտած առաջին ասորի պատգամավորը

Ըստ ոչ պաշտոնական արդյունքների` Մարդինից ընտրվել է Թուրքիայի առաջին ասորի պատգամավորը:

Հունիսի 12-ի խորհրդարանային ընտրություններում Մարդինում տեղի ունեցավ աննախադեպ իրադարձություն: Ոչ պաշտոնական արդյունքների համաձայն` Թուրքիայի առաջին ասորի պատգամավորն է ընտրվել Մարդինից: Քաղաքում ասորի թեկնածու Էրոլ Դորայից բացի` ընտրվել են նաև Ժողովրդավարական հասարակություն կոնգրեսի (DTK) համանախագահ Ահմեդ Թյուրքը և Քուրդիստանի համայնքների միությանն (KCK- KOMA CİWAKEN KÜRDİSTAN) առնչություն ունենալու մեղադրանքով կալանավոր Գյուլսեր Յըլդըրըմը:

Խաղաղություն և ժողովրդավարություն կուսակցության նախըտրական շտաբի առաջ հավաքված բազմությունն անկախ թեկնածու Էրոլ Դորային դիմավորեց մեծ խանդավառությամբ: Էրոլ Դորային ուսերի վրա տարած ամբոխն այնուհետև շուրջպարի բռնվեց հրավառության տակ… Հավաքված բազմության առաջ երախտիքի խոսք ասած Էրոլ Դորանը նշեց. «Ոչ ոք չի կարող բռնանալ ժողովուրդների կամքի վրա: Մայրենի լեզվով կրթությունը մեր իրավունքն է: Ահա և ժողովուրդը: Ժողովրդի կամքն ամփոփված է քվեատուփերում: Թո’ղ Անկարան իմանա, որ մենք այլևս խաղաղություն ենք ուզում: Կանենք այն ամենը, ինչ անհրաժեշտ է` արյունահեղությանը վերջ տալու համար: Մենք չենք ուզում, որ քուրդ և թուրք մայրերի աչքերից արտասուք հոսի: Մենք հավատում ենք ժողովուրդների եղբայրությանը: Ես շնորհակալություն եմ հայտնում ինձ աջակցած քուրդ, արաբ, թուրք, ասորի ժողովուրդներին և իմ թաղամասի բնակչությանը»:

Դորան, ուշադրություն հրավիրելով այն բանի վրա, որ Թուրքիան մտնում է նոր ժամանակաշրջան, նաև ասաց. «Ժողովուրդների արևն այլևս ծագել է Միջագետքից: Այդ արևն արդեն տարածվելու է դեպի արևելք: Ոչ ոք չի կարող բռնանալ ժողովուրդների կամքի վրա»:

Պատգամավոր են ընտրվել նաև Քուրդիստանի համայնքների միությանն (KCK- KOMA CİWAKEN KÜRDİSTAN) առնչություն ունենալու կասկածանքով ձերբակալված և Մարդինի բանտում ազատազրկված Գյուլսեր Յըլդըրըմը և Շըրնաքից առաջադրված Սելմա Ըրմաքը:

«Իհլաս» լրատվական գործակալություն

13.06.2011