«Արևմտականացող Ստամբուլի հայ ճարտարապետները» ցուցահանդեսը Հայաստանի ճանապարհին

Ինչպես հայտնում է «Ակօս» շաբաթաթերթը, «Ստամբուլը 2010 թ. Եվրոպայի մշակութային մայրաքաղաք» գործակալության, «ՀԱՅՃԱՐ» ճարտարապետների և ինժեներների միության նախաձեռնությամբ  կազմակերպված «Արևմտականացող Ստամբուլի հայ ճարտարապետները» ցուցահանդեսը Ստամբուլի ժամանակակից արվեստների թանգարանից, Բահչեշեհիր համալսարանի և Չանքայայի քաղաքապետարանի Ժամանակակից արվեստների կենտրոններից հետո ցուցադրվելու է Հայաստանում:

Երևանի Ճարտարապետության ազգային թանգարան-ինստիտուտում հունիսի 14-ից օգոստոսի 31-ը բացվելու է «Արևմտականացող Ստամբուլի հայ ճարտարապետները» ցուցահանդեսը: Ցուցահանդեսի կուրատորն է Հասան Քուրույազըջըն, իսկ նախագծի հեղինակը` Էրքալ Յավին: Ցուցահանդեսը նպատակ ունի ցույց տալ հայ ճարտարապետների ավանդները, ովքեր, 20-րդ դարի սկզբին ապրելով Ստամբուլում, այս քաղաքի ձևավորման գործում կարևոր դեր են կատարել: Նրանց մեծ մասն այսօր մոռացության է մատնվել:   «Արևմտականացող Ստամբուլի հայ ճարտարապետները» ցուցահանդեսում և համանուն ֆիլմում շուրջ 100 շենքերի լուսանկարները նկարել են Գյոքհան Թանը, Քամիլ Յըլմազը, Գյորքեմ Քըզըլայաքը, «Գալաթա» լուսանկարչատնից Սիբել Գյունաքը, Օզգյուր Բալին, Բահար Գյոքթենը,    Թանլա Օզուզունը, Բուրաք Քարան, Բերիլ Գյուրը, Անըլ Չիզմեջին, Ումուր Չոլգարը, Թուբա Քըլըչը, Դամլա Յեդիսանը, Սեմրա Յեշիլը, «Grid Collective»-ից Բուրաք Գյոլքեն, Դույգու Թոզդումանը, Սերա Դինքը և Թևֆիկ Գյոզլուքչուն:

Ցուցահանդեսն այնուհետև սեպտեմբերին ցուցադրվելու է Գյումրիում, իսկ հոկտեմբերին` Վանաձորում:

Ակօս, թիվ 792