Թուրքական «Հյուրիյեթ» պարբերականը հրապարակել է Թուրքիայի Շիշլիի առաջին ատյանի քաղաքացիական դատարանի այն որոշման հիմնավորումը, ըստ որի` Նոբելյան մրցանակի դափնեկիր թուրք գրող Օրհան Փամուքը պարտավորվում է հայցվորներից յուրաքանչյուրին վճարել 1000 թուրքական լիրա` որպես փոխհատուցում Շվեցարիայում տպագրվող «Das Magazin» ամսագրին տված հարցազրույցում «Մենք 30 հազար քուրդ և 1 միլիոն հայ ենք սպանել: Թուրքիայում ոչ ոք խիզախություն չունի այս մասին խոսելու: Ես ունեմ» խոսքերի համար:
Հիմնավորման մեջ մասնավորապես նշվում է, որ Փամուքը ճանաչվում է մեղավոր` «պատմական փաստերի վրա հիմնված իրողությունը խեղաթյուրելու, թուրք ժողովրդի բարոյական կերպարը ապականելու` ներկայացնելով նրան որպես ցեղասպան, մարդու իրավունքների ոտնահարման, թուրք ժողովրդին հրապարակայնորեն ստորացնելու համար»: Նշենք, որ Օրհան Փամուքը թուրք աշխարհառչակ գրող է։ 2005 թ.-ից սկսած հետապնդումների է ենթարկվել Թուրքիայում այն բանից հետո, երբ պնդել է, որ 1915 թ. հայերի սպանդը իրականացվել է թուրքերի կողմից։ 2006.թ.-ին նրա «Ձյունը» վեպը արժանացել է գրականության Նոբելյան մրցանակի։
03.06.2011
Leave a Reply