Ոչ բարյացակամ ընդունելություն. Թուրքիայի վարչապետի ընտրարշավը համշենցիներով բնակեցված քաղաքում անցել է բախումներով

Երեքշաբթի Թուրքիայի վարչապետ Ռեջեփ Թայիփ Էրդողանի ընտրարշավը մոտ 20 հազար համշենցիներով բնակեցված Խոփա քաղաքում անցել է բախումներով: Հակաիշխանական պաստառներով հանրահավաքի մասնակիցները քարեր են նետել Էրդողանի ավտոշարասյան ուղղությամբ:

Բախումների հետևանքով, որոնց ժամանակ Էրդողանին հաջողվել է անվնաս մնալ, մահացել է մեկ մարդ, իսկ շատերը, այդ թվում` վարչապետի թիկնապահներից մեկը, ծանր վիրավորվել են:

Համշենցիները մահմեդականացված հայեր են, որոնք հիմնականում բնակեցված են Թուրքիայի Արդվինի նահանգի Խոփայի և Բորչկայի գավառներում: Նրանց թիվը Թուրքիայում մոտ 50-60 հազար է:

Համշենցիների համայնքի հայտնի անդամ Իսմեթ Շահինը, որը մեկ ամիս առաջ ընդգրկվել էր քրդամետ «Խաղաղություն և ժողովրդավարություն» կուսակցության (BDP) ցուցակում խորհրդարանական ընտրություններին (այս ամիս) մասնակցելու համար, սակայն ավելի ուշ դուրս մղվել ցուցակից, ասում է, որ Էրդողանը նախապես զգուշացվել էր սպասվող ոչ հաճելի հյուրընկալության մասին:

«Էրդողանը հրաշալի գիտեր, թե իրեն ինչպե´ս կընդունեն այստեղ, նաև Դիարբեքիրում, ուր այսօր գնացել է, սակայն համառեց… Մենք ուզում ենք մեր իրավունքների ներկայացուցիչ ունենալ խորհրդարանում, բայց նրանք չեն հանդուրժի, դեռ պատրաստ չեն»,- «ԱրմենիաՆաուի» հետ հեռախոսազրույցում ասաց Շահինը:

Շահինն ասում է, որ Էրդողանը Խոփա է եկել աջակիցների մեծ թվով, որոնք պետք է մասնակցեին հանրահավաքին, մինչդեռ «դա ավելի շատ է զայրացրել բնակիչներին, որոնք դեմ են նրա կուսակցությանն ու փոքրամասնությունների նկատմամբ վարվող նրա քաղաքականությանը»:

Ըստ «Հյուրիեթ» թերթի` մի խումբ ցուցարարներ հանրահավաքի անցկացման վայրում տեղադրել էին «Էրդողա´ն, հեռացի´ր Խոփայից» կոչերով պաստառ ու քարկոծել Էրդողանի մեքենաների շարասյունը:

Ինչպես հաղորդվում է, ոստիկանությունը ստիպած է եղել ջրցան մեքենաներով ու արցունքաբեր գազով ցրել ցուցարարներին, որի հետևանքով, ըստ «Հյուրիեթի»` սրտի կաթվածից մահացել է մի տարեց ուսուցիչ: 9 մարդ վիրավորվել է, 6-ը թունավորվել են գազային նռնակից:

Թուրքիայում խորհրդարանական ընտրությունները կանցկացվեն հունիսի 12-ին:

ԳԱՅԱՆԵ ԱԲՐԱՀԱՄՅԱՆ
«ԱրմենիաՆաուի» թղթակից

http://armenianow.com/hy/news/30121/hamshen_armenians_turkey_prime_minister_elections