Ողջ Թուրքիան խոսում է այս լուսանկարի մասին

Թուրքիայի օրակարգում է Արդվինի Հոպա գավառում վարչապետ Էրդողանի ավտոշարասյան վրա կատարված հարձակման ժամանակ արված լուսանկարը:

Արդվինի Խոպա գավառում վարչապետ Էրդողանի ավտոշարասյան վրա քարերով հարձակման ժամանակ արված լուսանկարը Թուրքիայում ամենաշատ քննարկվող թեման է դարձել: Լուսանկարից երևում է, որ երբ վարչապետի` նախընտրական քարոզչության ավտոբուսի և ավտոշարասյան վրա հարձակում է կատարվել, ժանդարմներն ընդամենը դիտորդի դերում են եղել: Դեպքերի ժամանակ մի հոգի սրտի կաթված ստանալով` մահացել էր: Մեկ թիկնապահ ոստիկան էլ, ավտոմեքենայի վրայից սայթաքելով, արյան զեղում էր ստացել: Վարչապետի օգնական Բյուլենթ Արընչը նշեց, թե հարձակման ժամանակ զինվորների ցուցաբերած անտարբերությունը մտահոգիչ է: Արընչն ասաց. «Երբ ոստիկանները ցրում էին ցուցարարներին, ժանդարմները մի կողմ էին քաշվել: Այդ հանգամանքը հարցականների տեղիք է տալիս»: Պետնախարար Հայաթի Յազըջըն էլ ընդգծեց, թե դեպքերի ժամանակ անվտանգության լուրջ թերացումներ են նկատվել, իսկ երեկ Ստամբուլում հարցին անդրադարձած վարչապետ Էրդողանն արձագանքեց Ժողովրդահանրապետական կուսակցության առաջնորդ Քըլըչդարօղլուի «Քամի ցանողը փոթորիկ է հնձում» խոսքերին: Էրդողանն ասաց. «Ինչի՞ քամին էինք ցանել, որ փոթորիկ էլ հնձեինք: Այնտեղ Ժողովրդահանրապետական կուսակցության պաստառը կար, որի վրա գրված էր. «Միակ ճանապարհը փողոցն է, միակ ուղին` հեղափոխությունը», իսկ տակն էլ նշված` «Ժողովրդական տներ»: Ամեն ինչ պարզ է»:

Արդվինի Խոպայում վարչապետ Ռեջեփ Թայիփ Էրդողանի ավտոշարասյան վրա կատարված հարձակումը նախընտրական գործընթացի լարվածությունը հրահրող դեպքերից մեկը եղավ: Այս լուսանկարը, որը մնացել է այն դեպքերից, որի ժամանակ զոհվել է մեկ հոգի, և վիրավորվել մի թիկնապահ, դարձել է ամենաշատ քննարկվող թեման: Այն հանգամանքը, որ վարչապետի ավտոշարասյան տեղափոխվելու ժամանակ ժանդարմերիայի միավորումները չեն միջամտել և բավարարվելդիտորդի կարգավիճակով, քննարկումների տեղիք է տվել: Վարչապետի օգնական Բյուլենթ Արընչը քննադատեց ժանդարմների անտարբերությունը: «Հյուրիեթ» օրաթերթին հարցարզույց տված Արընչը նշեց. «Լուսանկարում երբ ոստիկանները ցրում են ցուցարարներին, ժանդարմները մի անկյուն են քաշված: Սա հարցականների տեղիք է տալիս: Պետք է պատասխանել այն հարցին, թե ինչու են ժանդարմներն անշարժ: Համոզված եմ, որ այնտեղի ամենաբարձր վարչական պաշտոնյան` կայմակամը (գավառապետը) այդ հարցի կապակցությամբ հանդես կգա մեկնաբանությամբ, բայց այն, որ զինվորներն անշարժ կանգնած էին, երբ ոստիկանությունը ջանքեր էր գործադրում` ցուցարարներին ցրելու ուղղությամբ, մեկնաբանության կարիք է զգում: Դրանք նախապես կազմակերպված դեպքեր էին: Ենթադրում եմ, որ կշարունակվեն մինչև ընտրությունների օրը»:

Նախարար Հայաթի Յազըջըն ևս նշեց, թե Էրդողանի` Խոպայում միտինգից առաջ և հետո տեղի ունեցած դեպքերի ժամանակ անվտանգության լուրջ թերացումներ են գրանցվել: Յազըջըն պատասխանելով լրագրողների հարցերին` հետևյալ տեսակետը հայտնեց. «Այս հարցը քննարկվելու է ներքին գործերի նախարարության տեսուչների կողմից: Անվտանգության մեր ուժերը նմանատիպ դեպքերում առիթ չպետք է տան դեպքերի հեղինակներին»:

Արդվինի նահանգապետ Մուստաֆա Յեմլիհալըօղլուն «Զաման»-ին տված հարցազրույցում նշեց, թե հարձակման դեպքի ժամանակ անվտանգության կողմից թերացումներ են եղել, ապա պատճառները պետք է բացահայտվեն: Յեմլիհալըօղլուն արձանագրելով, թե ժանդարմերիան այդ կետում պահվել է` միջոցներ ձեռնարկելու նպատակով, ժանդարմների` դեպքերին չմիջամտելուն ուղղված քննադատությունների կապակցությամբ ասաց. «Այդ հարցի առնչությամբ այս փուլում մեկնաբանություններ տալը ճիշտ չի լինի: Ներքին գործերի նախարարությունը քննիչներ է կարգել` դեպքը հետաքննելու համար: Հետաքննությունն ընթացքի մեջ է: Եթե թերացումներ եղել են, դրանք կբացահայտվեն»:

Արդվինի անվտանգության տնօրենը հրաժարական է տվել

Մյուս կողմից հրաժարական է տվել Արդվինի անվտանգության տնօրեն Մուհսին Արմաղանը: Նրան ժամանակավոր փոխարինող է նշանակվել ոստիկանության գլխավոր քննիչ Հյուսրև Սալմաները: Բամբասանքներ են շրջում, թե հրաժարական է տվել նաև նահանգապետ Յեմլիհալըօղլուն: Այդ խոսակցությունների կապակցությամբ նահանգապետը հանդես եկավ հետևյալ մեկնաբանությամբ. «Ես այս պահին իմ պաշտոնին եմ: Նման բան չկա»:

Անփութության պատճառը զույգ ղեկավարությունն է

Շրջանում պաշտոնավարած մի բարձրաստիճան ղեկավար ասաց, որ դեպքի ժամանակ եղել են վարչական և հետախուզական թերացումներ, և որ ժանդարմերիայի` դեպքերի հանդեպ պասիվությունը արմատական հարցերի տեղիք է տալիս: Վերոհիշյալ անձը նշեց. «Տեղի ունեցած դեպքերը ոչ թե ահաբեկչություն են, այլ վարչական միջոցառումների անբավարարություն և միջոցներ չձեռնարկելու հետևանք, որի պատճառն էլ պայմանավորված է ժանդարմերիայի` զույգ ղեկավար ունենալու հանգամանքով»:

Իրավասու անձը բացատրելով, թե դեպքի ժամանակ երկկողմանի անփութություն է ցուցաբերվել, նաև ուշադրություն հրավիրեց թե’ վարչական միջոցներ չձեռնարկվելու և թե’ ժանդարմերիային հարցաքննելու անհրաժեշտության վրա: Տեղական աղբյուրների համաձայն` վարչապետի մակարդակով այցերի ժամանակ տեղի ունեցած դեպքերին միջամտության և անվտանգության առաջնային պատասխանատվությունն ընկնում է նահանգապետի և գավառապետի վրա, սակայն նահանգի ու գավառի ժանդարմերիայի հրամանատարության տակ գտնվող զինվորներին օգտագործելու առումով կիրառվում է զույգ ղեկավարության սկզբունքը: Թեև գավառի կենտրոնները հսկողությունը վերապահված է ոստիկանությանը, սակայն գավառներն ու գյուղերը հսկվում են ժանդարմերիայի կողմից: Անվտանգության նկատառմամբ շրջանում գտնվող ժանդարմներին գործի դնելու համար անհրաժեշտ են, ըստ հերթականության, նահանգապետի, նահանգի և գավառի ժանդարմերիայի հրամանատների հրահանգները:

Պարզվում է` սրտի կաթվածի պատճառ է դարձել արցունքաբեր գազը

Դեպքերի ժամանակ վախճանված նախկին ուսուցիչ Մեթին Լոսքումջուի թաղման արարողությունը կատարվեց երեկ Քեմալփաշա քաղաքին ենթակա Դերեիչի գյուղում: Լոքումջուի թաղման արարողությունը, որի դին փաթաթված էր Երիտասարդ հեղափոխականների դրոշի մեջ, նախ տարվեց քաղաքապետարանի շենքի մոտ:

Այստեղ նրա մերձավորները կազմակերպեցին մի արարողություն, որից հետո էլ կատարվեց թաղումը: Նահանգապետ Մուստաֆա Յեմլիհալըօղլուն, հայտնելով, թե Լոքումջուն մահացել է սրտի կաթվածից, հանդես եկավ հետևյալ մեկնաբանությամբ. «Տրապիզոնի դատաբժշկական հաստատությունից ստացված զեկույցի համաձայն` Լոքումջուի մարմնի վրա հարվածի հետքեր չեն եղել»: Ըստ տեղեկության` Լոքումջուն սրտի կաթված է ստացել արցունքաբեր գազի պատճառով:

Վիրավորված ոստիկանը քնած է մնալու 72 ժամ

Վարչապետ Էրդողանի ավտոշարասյան վրա քարերով հարձակման ժամանակ ոստիկան Սերվեթ Էրքանի բուժումը կատարվում է Ռիզեի համալսարանի Կրթության և գիտական ուսումնասիրությունների հիվանդանոցում:

Գլխավոր բժիշկ Հասան Թյուրյութը հաղորդեց. «Հիվանդի ուղեղում կատարված ցնցումը և արյան զեղումը խնդիր է հարուցել ուղեղի գնդում: Մենք շտապ վիրահատություն կատարեցինք: Վիրահատությունը հաջող անցավ: Նա դեռ 72 ժամ քնած կմնա»:

Զոհված ուսուցչի դին փաթաթված էր Երիտասարդ հեղափոխականների դրոշով

Խոպայի դեպքերի ժամանակ սրտի կաթվածից մահացած նախկին ուսուցիչ Մեթին Լոքումջուի դին երեկ հանձնվեց հողին: Պարզվեց, որ Լոքումջուն, որի դին փաթաթված էր Երիտասարդ հեղափոխականների դրոշով, սրտի կաթված է ստացել ոստիկանների բաց թողած արցունքաբեր գազի պատճառով: Ինչ վերաբերում է ժանդարմների` դեպքերին չմիջամտելու հանգամանքին, նահանգապետ Մուստաֆա Յեմլիհալըօղլուն հայտնեց, թե ներքին գործերի նախարարությունը հետաքննություն է սկսել, և որ տվյալ պահին դեռ որևէ պարզաբանում չի կարող տալ: Իրավասուները պահանջեցին, որ հետաքննություն սկսվի նաև վարչական միջոցներ չձեռնարկածների նկատմամբ:

02.06.2011

http://www.ihlassondakika.com/haber_Turkiye-bu-fotografi-konusuyor_379830.html