Ըստ «Վաթան» օրաթերթի` Խոպայի կայմակամ Աբդուլլահ Աքդաշը հաղորդել է, որ Արդարություն և զարգացում կուսակցության` Խոպայում կայացած հանրահավաքից առաջ և հետո տեղի ունեցած դեպքերի կապակցությամբ ձերբակալվել են 11 հոգի: Աքդաշը Անադոլու գործակալության թղթակցին հայտնել է, թե Արդարություն և զարգացում կուսակցության` Խոպայի Ջումհուրիյեթ հրապարակում կայացած հանրահավաքից առաջ և հետո կատարված դեպքերի կապակցությամբ տարվող հետաքննության շրջանակներում ազատազրկվել են 11 հոգի: Աքդաշը նաև նշել է, որ այդ 11 կասկածյալները անվտանգության բաժանմունքում կատարված ձևակերպումներից հետո ուղարկվել են հանրապետական դատախազություն, և որ նրանց հարցաքննությունն ընթացքի մեջ է: Խոպայի կայմակամը նաև հաղորդել է, թե գավառում տվյալ պահին ոչ մի բացասական զարգացումներ չեն նկատվում:
Հիշեցնենք, որ Թուրքիայի վարչապետ Ռեջեփ Թայիփ Էրդողանի` նախընտրական քարոզարշավի շրջանակում երեկ կազմակերպած հանրահավաքի ժամանակ բախումներ էին գրանցվել իրավապահների և Արդարություն ու զարգացում կուսակցության հեռացումը պահանջող ցուցարարների միջև: Երբ Էրդողանի ավտոշարասյունը հանրահավաքից հետո շարժվել էր Խոպայից, ցուցարարներն սկսել էին քարկոծել նրա ավտոբուսը։
01.06.2011
Leave a Reply