Շոկ առաջացնող պնդում

Ժողովրդահանրապետական կուսակցության պատգամավորների ցանկում Քեմալ Քըլըչդարօղլուի կողմից խցկվել են ՊԿԿ-ի 40-ի չափ անդամներ:

«Նոր դաշինքի» Անկարայի ներկայացուցիչ Յեներ Դյոնմեզը «Եթե նրանք ընտրվեն, ՊԿԿ-ն կարող է հանգի~ստ շունչ քաշել» վերնագրով հոդվածում հանդես է եկել շոկ առաջացնող պնդմամբ:

Դյոնմեզը հաղորդում է, թե Քըլըչդարօղլուի ներկայացրած պատգամավորների թեկնածուների ցանկում կան 13 հոգու անուններ, ովքեր դատական արձանագրություններում նշվել են որպես ՊԿԿ-ի հետ շփումներ ունեցած անձինք: Եթե հաշվի առնենք նաև նրանց, ում եղբայրները կամ մոտ ազգականները ՊԿԿ-ի համակիրների շարքում են, ապա Ժողովրդահանրապետական կուսակցության ընտրացուցակում ՊԿԿ-ի հետ առնչվող անունները կանցնեն 40-ից:

Դյոնմեզի հոդվածը հետևյալն է.

“Այն օրերն էին, երբ Ժողովրդահանրապետական կուսակցությունը դեռ չէր կարողացել հաղթահարել տեսաձայնագրության պատճառով առաջացած շոկը: Կուսակցության` հրաժարական տված առաջնորդ Բայկալի հետ հանդիպած Քըլըչդարօղլուն նախ ասել էր, թե «Կուսակցության գլխավոր նախագահի թեկնածու չեմ լինի», ապա` կատարված փաստով անցել էր Ժողովրդահանրապետական կուսակցության ղեկավարի պաշտոնին:

Այն օրերին մեզ հետ հանդիպած Ժողովրդահանրապետական կուսակցության ծանր հրետանին Քըլըչդարօղլուի` ՊԿԿ-ի հետ առնչություն ունենալու մասին ենթադրությունների կապակցությամբ ասել էր. «Եթե այդ խոսակցությունները ճիշտ են, գլխավոր կենտրոնը նրա գլխին կջարդեմ»: Սակայն Քըլըչդարօղլուի` գլխավոր նախագահի աթոռին նստելուց քիչ անց Թունջելիում (Դերսիմ) հանդես եկավ «համաներում» հայտարարելու առաջարկությամբ, համաներում, որը տարածվելու էր նաև ՊԿԿ-ի անդամների վրա, և դա եղավ Ժողովրդահանրապետական կուսակցության քաղաքականության փոփոխության առաջին նշանը: Ժողովրդահանրապետական կուսակցության Քըլըչդարօղլու-Թեքին խմբի տիրապետող դառնալուց անմիջապես հետո կուսակցությնում նկատվեց ՊԿԿ-ի հետ ակնհայտ մերձեցում: Ալևի, քուրդ և հայ բազմաթիվ առաջատար դեմքեր այս շրջանում սկսեցին անցնել Ժողովրդահանրապետական կուսակցության շարքերը:

Ուշագրավ էր նաև, որ Մեհմեդ Մողուլթայը վերստին անցավ Ժողովրդահանրապետական կուսակցության շարքերը: Հայտնի է, որ վերջինիս եղբայրը` Մուզաֆֆեր Մողուլթայը, Միջին Արևելքի տեխնիկական համալսարանում ուսանելու տարիներին Օջալանի հետ մեկտեղ եղել է ՊԿԿ-ի հիմքը դնող անձանցից մեկը, ՊԿԿ-ի համար արված բանկի կողոպուտի և մարդասպանության հանցագործությունների պատճառով երկար տարիներ բանտում անցկացնելուց հետո զրկվել է քաղաքացիությունից և ճողոպրել Գերմանիա:

Այդպիսով՝ Թուրքիայի ամենահին կուսակցությանը սպասում էր բոլորովին նոր մի ժամանակաշրջան: Ժողովրդահանրապետական կուսակցությունը նոր շրջանում ՊԿԿ-ի ահաբեկչականների դատական գործերի ընթացքում սկսեց տեր կանգնել ՊԿԿ-ի անդամներին: Այն աստիճան, որ Քըլըչդարօղլուն արևելյան նահանգներում կազմակերպված հարհավաքներում սկսեց ամբիոնից քննադատել KCK-ի (Քուրդիստանի համայնքների միություն) գործով կատարվող ձերբակալությունները: Քըլըչդարօղլուն, այդքանով էլ չբավարարվելով ու Գերմանիայում Ազատություն և համերաշխություն կուսակցության (ÖDP) ու Խաղաղություն և ժողովրդավարություն կուսակցության (BDP) անդամների հետ միաբանվելով, որոշեց հիմնել Ձախակողմյան պլատֆորմ:

Ժողովրդահանրապետական կուսակցությունն իր թափը չէր կոտրում և մեկը մյուսի հետևից ցատկեր էր կատարում: Հալֆեթիի քաղաքապետարանը, որը բաղկացած էր Ժողովրդահանրապետական կուսակցության անդամներից, ապրիլի 4-ին հրապարակավ աջակցեց Օջալանի տարեդարձի օրվան նվիրված միջոցառումներին: Այդպիսով՝ գլխավոր ընդդիմություն Ժողովրդահանրապետական կուսակցությունը պատմության մեջ անցավ որպես Ապօյի ծննդյան օրը նշած կուսակցություն: Շըրնաքում և Հաքքարիում իրականացված գործողությունների ընթացքում, երբ սպանվեցին ՊԿԿ-ի 12 անդամներ, ՊԿԿ-ն և Խաղաղություն և ժողովրդավարություն կուսակցությունը (BDP) բոյկոտի որոշում կայացրեցին: Այդ որոշմանն ամենամեծ աջակցություն ցուցաբերած կուսակցությունը դարձյալ Ժողովրդահանրապետական կուսակցությունը եղավ, որը ՊԿԿ-ի հետ միասին սգաց ահաբեկիչների համար:

ՊԿԿ-ի բոյկոտին տեր կանգնած Ժողովրդահանրապետական կուսակցությունը լիովին աջակցություն ցուցաբերեց ՊԿԿ-ին` փակելով նաև Դիարբեքիրում (Տիգրանակերտ) միակ ընտրատեղամասը: Նոր Ժողովրդահանրապետական կուսակցությունը ջանք չխնայեց նաև Դիարբեքիրում կատարվող փակման գործողություններին աջակցելու առումով: Քըլըչդարօղլուն Հաքքարիում կազմակերպված հանրահավաքում կատարեց ՊԿԿ-ի նպատակին ուղղված իր ամենամեծ խոստումը և տեղական իշխանություններին ինքնավարություն խոստացավ` ՊԿԿ- BDP զուգահեռով:

Ի՞նչ է նշանակում այս ամենը:

Չէ՞ որ այն ժամանակ Ժողովրդահանրապետական կուսակցության ծանր հրետանին ասել էր, թե «… գլխավոր կենտրոնը նրա գլխին կջարդեմ»…

Տեսանք, թե գլխավոր կենտրոնը ում գլխին ջարդվեց…

Իր տարիները Ժողովրդահանրապետական կուսակցությանը նվիրաբերեց այդ ծանր հրետանին, և մյուս ծանր հրետանիներն այսօր թեկնածու անգամ չառաջադրվեցին…

Քըլըչդարօղլու-Թեքին զույգը դրա փոխարեն պատրաստեց շոկ հարուցող մի ցանկ, որին կարող եք հետևել նաև մեր հետագա հրապարակումներում… Ըստ ենթադրությունների` դա մի ցանկ է, որի վրա իր կնիքն է թողել ՊԿԿ-ն… Դատական արձանագրությունների մեջ գրանցված 13 անձինք անձամբ խառնված են եղել ահաբեկչությանը: Կան նաև 30-ի չափ անուններ, որոնց ազգականներին են մասնակցել ահաբեկչական գործողություններին: Եթե այդ անձինք ընտրվեն, «ՊԿԿ-ն հանգի~ստ շունչ կքաշի»… Մի՞թե այդ ապագան էր սպասում Մուստաֆա Քեմալի հիմնած կուսակցությանը: Սրանք լավ նախանշաններ չեն…»:

28.05.2011

Իհլաս լրատվական գործակալություն