Պեղվում է հին Վան քաղաքը

Պեղվում է Վանա ամրոցի հարավում գտնվող հին Վան քաղաքի հայկական եկեղեցին:
Թուրքիայի մշակույթի և զբոսաշրջության նախարարության պրոյեկտի շրջանակներում պեղվող այս եկեղեցին վերականգնվելուց հետո կբացվի զբոսաշրջիկների առջև: Պեղման և վերականգնողական աշխատանքներն իրականացնող ընկերության շինղեկ Ադնան Վուրալը նշեց, որ “եկեղեցու պեղումներից հետո մեկ անգամ էլ կապացուցվի, թե Վանը եղել է հանդուրժողականության քաղաք”: Վուրալը նաև հայտնեց. “Այս եկեղեցին պատկանել է օսմանյան շրջանին: Այն հանգամանքը, որ եկեղեցիներն ու մզկիթները կողք կողքի են եղել, մեզ ցույց է տալիս, որ Վանը հանդիսացել է քաղաքակրթությունների օրրան”:
Թուրքիայի մշակույթի և զբոսաշրջության ու Վաքըֆների գլխավոր տնօրինության նախագծի շրջանակներում հին Վան քաղաքի վերականգմանն ուղղված աշխատանքները շարունակվում են: Անցյալ տարի մեկնարկած աշխատանքների շնորհիվ ամրոցի պարիսպները երկու միլիոն թուրքական լիրա գումարով վերականգնվելուց հետո մեկ առ մեկ վերակառուցվում են նաև ամրոցի հարավային մասում գտնված բնակավայրերը: Պատմական հուշարձանների ի հայտ բերվելու շնորհիվ նկատվեց, որ հին Վան քաղաքը եղել է “Հանդուրժողականության քաղաք”: Ի վերջո, “Ալֆին Յափը” արդյունաբերության և առևտրի` սահմանափակ պատասխանատվությամբ կենտրոնի կողմից կատարվող պեղումնային աշխատանքների ընթացքում ի հայտ բերվեց մի հայկական եկեղեցի, և հաստատվեց, որ այն պատկանել է օսմանյան ժամանակաշրջանին: Եկեղեցու վերականգնողական աշխատանքների ընթացքում ուշադրություն գրավեց այն հանգամանքը, որ եկեղեցին և Քայա Չելեբի մզկիթը գտնվել են կողք կողքի: Վերականգնողական ու պեղումնային աշխատանքներն իրականացնող ընկերության շինղեկ Ադնան Վուրալը հայտնեց, որ աշխատանքները շուտով ավարտին կհասցվեն, և եկեղեցին կբացվի զբոսաշրջիկների առաջ:
Քաղաքակրթությունների օրրան Վանը
Վուրալը նշելով, թե եկեղեցու և մզկիթների կողք կողքի լինելը ցույց է տալիս, որ տարբեր կրոններ դավանող ժողովուրդները համատեղ են գոյատևել, ասաց. “Բացի սրանից կան ևս 2-3 եկեղեցիներ, որոնց նախագծերը մշակելուց հետո կսկսենք պեղումները: Այս եկեղեցիները պեղելուց հետո մյուս պատմական կառույցները ևս հայտնագործելու համար կշարունակենք մեր աշխատանքները: Հին Վան քաղաքում Հյուսրևփաշա մզկիթը և ուսումնարանը վերականգնվում են 1 միլիոն 280 հազար թուրքական լիրայով, Քայա Չելեբի մզկիթը` 350 հազարով, պալատի դուռը` 750 հազարով, իսկ հայկական եկեղեցին` 39 հազարով: Եկեղեցին, որը պեղում ենք ներկա պահին, գտնվում է հայկական թաղամասում: Եկեղեցու կողքին էլ Քայա Չելեբի մզկիթն է: Սա ևս մեզ ցույց է տալիս, որ Վանն անցյալում եղել է քաղաքակրթությունների օրրան”:

Դողան լրատվական գործակալություն
28.05.2011