Խելահեղ նախագիծ, որը զբոսաշրջիկների մեծ հոսք է ապահովելու դեպի Վան

Էրդողանը վանեցիներին հայտնեց խելահեղ նախագծի ավետիսը, որն իրականացվելու է 20 հազար ակր հողատարածքի վրա:

Շրջանի ամենամեծ նահանգներից մեկը եղող և հարևան երկրների համար անցակետ հանդիսացող Վանում հիմնվելու է «Նովրուզի լեգենդների երկիրը», որը կառուցվելու է 20 հազար ակր հողատարածքի վրա: Այդ նոր քաղաքը դառնալու է զվարճանքների, առևտրի, զբոսաշրջության, մարզական ու մշակութային կենտրոն: Նախագծի նպատակն է կանխել արտագաղթը և ուժեղ հակահարված տալ ահաբեկչությանը…

«Ջրանցք Ստամբուլից» հետո նմանատիպ մեկ այլ նախագիծ էլ իրականացվելու է Վանում, որի մասին, սպասվում է, որ կհայտարարի վարչապետ Ռեջեփ Թայիփ Էրդողանը` այսօր Վանում նախատեսվող հանրահավաքի ժամանակ: Ըստ «Զաման» օրաթերթի` «Նովրուզի լեգենդների երկիրը» նախագիծը, որի տեխնիկական աշխատանքներն արդեն ավարտին են հասցվել, իրականացվելու է 20 հազար ակր ընդգրկող տարածքի վրա և արժենալու 3 միլիարդ դոլար: Ահաբեկչությունը և արտագաղթը կանխելուն ուղղված սույն քաղաքի հիմնման ընթացքում աշխատանքով կապահովվեն 60 հազար հոգի: Իրանի, Իրաքի, Ադրբեջանի, Հայաստանի և Վրաստանի անցումային կետում գտնվող Վանը ողջ տարածաշրջանի համար նորույթ եղող սույն խոշոր նախագծով կվերածվի մի հրաշալի կենտրոնի: «Նովրուզի լեգենդների երկրում», որը շինարարության ավարտից հետո, ըստ կանխատեսումների, տարեկան կհյուրընկալի 4 միլիոն զբոսաշրջիկի, կլինեն Դիսնեյլենդի նման զվարճանքների կենտրոն, Թուրքիայի առաջին պատերազմական թանգարանը` «Չալդրանի ճակատամարտի թանգարանը», Ազգային սպորտի թանգարանը, առևտրի հարյուրավոր կենտրոններ, կոնգրեսի տարածքներ, գազանանոցներ և 58 հազար բնակարաններ:

Արդարություն և զարգացում կուսակցության կողմից Վանում առաջադրված պատգամավոր Բուրհան Քայաթյուրքի հաղորդած տեղեկությունների համաձայն` այս նոր Վան քաղաքի նախագիծն իրագործվելու է 4 փուլով: Տեխնիկական ու տնտեսական հիմնավորման աշխատանքներն իրականացվել են ԱՄՆ-ի և Կանադայի մասնագետների միջոցով: Մաստեր-պլանը նույնպես գծագրվել է ամերիկացի մի խմբի կողմից: Պրոյեկտը բաղկացած է մոտ 58 հազար բնակարանից ու առևտրի հարյուրավոր կենտրոններից: Տուրիստական հաստատությունները կազմված են 7 տարբեր բաժիններից, և կառուցվելու են այնպես, որ օրեկան տեղավորեն 45 հազար 124 զբոսաշրջիկի: Բացի 4 մեծ հյուրանոցներից` դրանց շարքում է նաև փակ ջրաշխարհը: Ըստ պրոյեկտի, սույն ջրաշխարհը` 141 հազար քմ տարածքով, հավակնում է դառնալ ոչ միայն Միջին Արևելքի, այլ նաև` Եվրոպայի ամենամեծ ջրաշխարհը: Բացօթյա ջրաշխարհի համար ևս մշակվել է 308 հազար քմ տարածքով մի նախագիծ:

Հիմնվելու է նաև Չալդրանի ճակատարամտի թանգարանը

«Նովրուզի լեգենդների երկիրը» միևնույն ժամանակ դառնալու է Թուրքիայի առաջին թեմատիկ զվարճանքների քաղաքը: Քայաթյուրքը հետևյալը հայտնեց նախագծում տեղ գտած մյուս կետերի մասին. «Ստեղծվելու է մի կրթական կենտրոն, որտեղ երեխաներն ուսանելու են գիտություն, արվեստ ու մշակույթ, բացի այդ` այստեղ լինելու են խաղալիքներ, և կազմակերպվելու են խաղեր: Հիմնվելու է նաև Ազգային սպորտի կենտրոնը, որտեղ պատանիները միջազգային օլիմպիական չափանիշներով սովորելու են բոլոր մարզաձևերը, իսկ թվայնացված միջավայրում` մասնակցելու ամեն տեսակի սպորտաձևերի: Կառուցվելու է նաև «Չալդրանի ճակատամարտի թանգարանը», որը կդառնա Թուրքիայի առաջին պատերազմական թանգարանը: «Քաղաքակրթությունների մշակույթի կենտրոնում» կներկայացվեն թե’ մարդկության բոլոր կրոնները և թե’ հին մշակույթների կրոնական հավատալիքների լեգենդներն արտացոլող պատկերներ:

Բուրհան Քայաթյուրքը մատնանշելով, թե «Նովրուզի լեգենդների երկիրը» նախագիծն իր տեսակի մեջ առաջինն է ոչ միայն Թուրքիայում, այլ նաև` Միջին Արևելքում, ասում է. «Սույն նախագիծը կլուծի տվյալ շրջանի բնակչության քաղաքական խնդիրները, ելք կդառնա` գործազրկությունն ու չքավորությունը վերացնելու առումով: Անատոլիայի (Արևմտյան Հայաստան-Ակունքի խմբ.) պատմական ժառանգությունը ներկայացնելը կծառայի ոչ միայն շրջանի ժողովրդի, այլ նաև` Թուրքիայի շահերին: Երբ պրոյեկտն իրագործվի, այն կգրավի 4 միլիոն զբոսաշրջիկի»:  

Կներկայացվի հազարամյա պատմությունը

Պրոյեկտի ամենամեծ հիմնասյուներից մեկն էլ հազարամյա անցյալ ունեցող շրջանի պատմական ժառանգությունը վեր հանելն ու ներկայացնելն է: Քայաթյուրքը նշելով, թե «Անատոլիան 12 հազար տարվա պատմություն ունեցող, բազմաթիվ հայտնի քաղաքակրթությունների և մշակույթների, ամեն տեսակի կրոնական, մշակութային, արվեստի և քաղաքական լեգենդների տարածք է» նաև ընդգծում է. «Մենք «Նովրուզի լեգենդների երկիրը» նախագծով ծրագրում ենք այդ պատմական լեգենդներն ու մշակույթները վեր հանել այսօրվա գիտական տեխնոլոգիաների միջոցով: Անցած հարյուրամյակների պատմական դեպքերը ներկայացնելու համար հիմնականում օգտագործվել են նկարներ, քանդակներ ու ֆիլմեր: Մենք սույն պրոյեկտով, ներկայիս գիտական տեխնոլոգիաները կիրառելով, ջանացել ենք վերականգնել պատմությանը հայտնի բոլոր լեգենդները»:

Թուրքական լրատվական գործակալություններ

20.05.2011