Իսրայելի կառավարության կողմից Հայոց ցեղասպանության հարցը օրակարգ մտցնելը հույս է ներշնչում, որ այն կընդունվի Կնեսետի կողմից. ՀՅԴ

Իսրայելի խորհրդարանի Կրթության եւ մշակույթի հանձնախմբում Հայոց ցեղասպանության հարցի քննարկումը հույս է ներշնչում, որ հարցն այս անգամ կընդունվի խորհրդարանի կողմից: Այս մասին NEWS.am-ի թղթակցի հետ զրույցում ասաց ՀՅԴ Հայ դատի Երուսաղեմի հանձնախմբի պատասխանատու Հակոբ Սեւանը: Նա նշեց, որ Ցեղասպանության հարցի քննարկումը տեղի հայ լոբբիստների տարիների տքնաջան աշխատանքի արդյունք է: Վերջին երկու տարիներին, ըստ Սեւանի, Կնեսետը խոչընդոտում էր Ցեղասպանության հարցի արծարծմանը, մինչդեռ Իսրայելը Հայոց ցեղասպանությունը ճանաչած առաջին երկրներից պետք է լիներ: Իսկ այսօր արդեն արեւմտյան երկրներից վերջինն է, որն սկսել է ճանաչման գործընթացը:

«Այս տարի ընթացող քննարկումները կարեւորվում են այն առումով, որ հարցը օրակարգ է մտցրել Իսրայելի կառավարությունը: Սա լուրջ առաջընթաց է, ինչը հուշում է, որ Ցեղասպանությունը կընդունվի Կնեսետում»,-հայտարարեց Սեւանը:

Հարցին, թե ի՞նչն է պատճառը, որ նախորդ տարիներին հարցը մտցվում էր Կնեսետի արտաքին հարաբերությունների եւ պաշտպանության հանձնախումբ, իսկ այս տարի`Կրթության եւ մշակույթի հանձնախումբ, դաշնակցական գործիչն արձագանքեց. «Մենք մշտապես պահանջում էինք, որ հարցը քննարկվի հենց այս` Կրթության եւ մշակույթի հանձնախմբում, քանի որ այդ հանձնախմբում մենք մեր խոսքը լսեցնելու հնարավորություն ունեիք: Իսկ արտաքին հարաբերությունների եւ պաշտպանության հանձնախմբում քննարկումը ծավալվում էր փակ ռեժիմով եւ այն, որպես կանոն, պատճառ էր բերում Թուրքիայի հետ հարաբերությունների վտանգումն ու կախակայում հարցը: Սակայն կառավարության ներկայացուցիչը հայտարարեց, որ հարցը պետք է ավելի բաց քննարկվի եւ ուղարկվի Կրթության եւ մշակույթի նախարարություն, ինչը մեծ առաջընթաց է»:

Ըստ Սեւանի, Իսրայելի կողմից Ցեղասպանության ճանաչումը կհանգեցնի ԱՄՆ-ի կողմից ճանաչման գործընթաց սկսելուն, քանի որ հրեական լոբբիստները մեծ ազդեցություն ունեն ամերիկյան կառավարությունում:

Անդրադառնալով Ցեղասպանության հարցի ճանաչումից հետո Իսրայել-Հայաստան հարաբերություններին, Սեւանը նշեց, որ ճանաչումը դրական ազդեցություն կունենա: Իսրայելի ներկայացուցիչները, Սեւանի խոսքով, տեղի համայնքի ներկայացուցիչների հետ շփումների ժամանակ մշտապես խոսում են Հայաստանի հետ հարաբերությունները զարգացնելու մասին: «Այն, որ աշխարհաքաղաքական զարգացումներում կարեւոր տեղ զբաղեցնող երկրում` Իսրայելում հայ համայնք կա եւ գործում է հայ եկեղեցի, պարտավորեցնող է Հայաստանի համար: Հայաստանը պետք է լավ հարաբերություններ ունենա Իսրայելի հետ` ի նպաստ տեղի հայ գաղութի»:

Ինչ վերաբերում է Իսրայել-Թուրքիա հարաբերությունների վրա Հայոց ցեղասպանության ճանաչման ազդեցությանը, ապա NEWS.am-ի զրուցակիցի խոսքով, պետք է սպասել, թե եկող օրերին Թուրքիան ինչպիսի հակազդեցություն կցուցաբերի: «Մենք մեր արդար պահանջն ենք առաջ տանում, եւ Թուրքիայի կամ մեկ այլ պետության հակազդեցությունը որեւէ կերպ չեն կարող ազդել մեզ վրա»,-նկատեց դաշնակցական գործիչը:

Նշենք, որ Հայոց ցեղասպանության ճանաչման հարցը Կնեսետի կրթության եւ մշակույթի հանձնաժողով էր ներկայացրել ձախ ուղղվածության «Մերեց» կուսակցությունը, որին աջակցել է Իսրայելի վարչապետ Նեթանյահուի գլխավորած «Լիկուդ» կուսակցությունը: Հայոց ցեղասպանության ճանաչումը քննարկելու պահանջը խորհրդարանական հանձնաժողովում հավանության է արժանացել ձայների մեծամասնությամբ: Մինչ կրթության հանձնաժողով ուղարկելը, Կնեսետի նիստում բոլոր մասնակիցները, այդ թվում Կնեսետի նախագահը, պաշտպանել են քննարկումները շարունակելու որոշումը, ընդգծելով, որ Թուրքիայի հետ Իսրայելի հարաբերությունները չպետք է Հայոց ցեղասպանությունը չճանաչելու պատճառ դառնան:

Լուրեր Հայաստանից – NEWS.am

21.05.2011