Ֆրանսիայի Սենատում Հայոց ցեղասպանության մասին օրինագծի՝ քննարկումներից դուրս մնալը վերագրել թուրքական լոբբիի հաղթանակին, ճիշտ չի լինի, որովհետեւ այդ երկրի նախագահ Նիկոլա Սարկոզին արդեն իսկ հայտարարել էր, որ իրենք դեմ են օրենքի ընունմանը։ Մայիսի 13-ին տեղ ունեցած մամուլի ասուլիսի ժամանակ այս մասին հայտարարեց ՀՅԴ հայ դատի եւ քաղաքական հարցերի գրասենյակի ղեկավար Կիրո Մանոյանը։
«Իրականում սա ոչ այնքան թուրքական լոբբիի հաղթանակն էր, որքան Ֆրանսիայի իշխանությունների կեցվածքի դրսեւորում։ Ֆրանսիան մտածում է, որ եթե մերժում է Թուրքիային ԵՄ անդամ դառնալու հարցում, ապա կարիք չկա բարձրացնել հարցեր, որոնք ավելի շատ կնեղացնեն Թուրքիային։ Այլ կերպ ասած, սա Ֆրանսիայի կողմից հակաթուրք չերեւալու մի քայլ էր»,- բացատրեց Մանոյանը։
NEWS.am-ի թղթակցի խնդրանքով անդրադառնալով Ամերիկայի Հայ Դատի գրասենյակի եւ հայ համայնքի տրամադրություններին՝ կապված Հայաստանում ԱՄՆ նոր դեսպանի հավանական թեկնածուի նշանակման հետ, Մանոյանը նկատեց, որ ամերիկահայ համայնքը որեւէ կոնկրետ թեկնածու չունի, «որովհետեւ հազարավոր են այն դիվանագետները, որոնցից ԱՄՆ նախագահն ընտրելու հնարավորություն ունի»:
«Սակայն համոզված եմ, որ ամերիկահայ համայնքը զգոն կլինի, որպեսզի Սենատի լսումների ժամանակ՝ դեսպանի հաստատման նախօրեին. չստացվի այնպես, որ նա Հայաստանում ընդունելի չլինի»,- ասաց ՀՅԴ-ական գործիչը:
Նշենք, որ Հայաստանում ԱՄՆ դեսպան Մարի Յովանովիչն իր եռամյա առաքելությունը որպես Հայաստանում ԱՄՆ դեսպան կավարտի այս տարվա հունիսին:
Նա կվերադառնա Վաշինգտոն որտեղ կստանձնի Հյուսիսային եւ Կենտրոնական Եվրոպայի հարցերով պետքարտուղարի փոխտեղակալի պաշտոնը:
Մայիս 13, 2011
Leave a Reply