Ես հայ չեմ, բայց հայերին սիրում եմ, ինձ ոսկու տեղերը կասե՞ս. առաջարկ NEWS.am-ի թղթակցին

Թուրքիայի արեւելյան հատվածում՝ հիմնականում Արեւմտյան Հայաստանում, շարունակվում է «հայերի թաքցրած ոսկու» տենդը:  Արկածախնդիրները շարունակում են հայերի հետ կապված բնակավայրերում փնտրել  Ցեղասպանությունից առաջ հայերի պահած «գանձերը»: Նրանք առիթը բաց չեն թողնում իրենց պապերի երկիրն այցելության եկած հայերից հետաքրքվել  «թաքցրած ոսկիների» խնդրով՝ տարբեր «խոստումնալից» առաջարկներ անելով:

Վան այցելած հայ եւ թուրք լրագրողների խմբի մեջ ընդգրկված NEWS.am-ի թղթակցին եւս «գանձ որոնողները»  տարբեր առաջարկություններ արեցին:  Վանում «գանձ որոնողների» մեծ մասն առաջարկում էր ասել դրանց տեղը՝ խոստանալով գտնվածի կեսը: Իսկ ամենազավեշտալի առաջարկն արեց Վանի սննդամթերքի փոքրիկ խանութ աշխատեցնող Ալին, ով իմանալով, որ իր հետ զրուցող NEWS.am-ի թղթակիցը հայ է՝ սկսեց գովել հայերին, քննադատել երիտթուրքերին, ովքեր կազմակերպեցին հայերի կոտորածը: Այն հարցին, թե Ալին հա՞յ է, վերջինս պատասխանեց. «Հայ չեմ, բայց հայերին սիրում եմ: Ցավում եմ, որ նրանց հետ նման դժբախտություն պատահեց: Բայց նրանք այս կողմերում շատ ոսկիներ են պահել, որոնք անիմաստ կորչելու են:  Ինձ ասա դրանց տեղը, քեզ նույնպես բաժին կհանեմ»:

Երբ Ալին առաջարկում էր ոսկիների հետ կապված «գործարքը», խանութ մտած այցելուներից մեկը՝ Բենգին, պնդեց, թե հարամ է ուրիշի դժբախտության վրա հարստանալ, քանի որ նրանք կոտորվել են եւ փրկվելու համար ստիպված թողել են իրենց ունեցվածքն ու հեռացել: Նա պատմեց, որ տարիներ առաջ Վանա լճի կողքին գտնվող Արճեշի գյուղերից մեկում Վանի նահանգապետարանում վարորդ աշխատող մի երիտասարդ պատահաբար ոսկիներ էր հայտնաբերել, սակայն այդ գյուղի բնակիչներից մեկը զենքի սպառնալիքով խլել էր ոսկիները եւ սպառնացել վարորդին, որ պահանջ ունենալու դեպքում նրան կվերացնի:

«Գտած ոսկիները խլած անձնավորւթյան ընտանիքում դժբախտությունների շարանի պատճառ էր դարձել: Գյուղացին հասկանալով, որ դժբախտության պատճառը խլած ոսկին է, գալիս է Վան, վարորդից ներողություն խնդրում եւ դրա դիմաց գումար առաջարկում: Բայց վարորդը վիրավորված էր եւ մերժում է այդ առաջարկը: Դրանից շատ չանցած ոսկին խլած անձնավորության ամբողջ ընտանիքի անդամները տարբեր պատճառներով մահացան»,-պատմել է Բենգին:

Վանում NEWS.am-ի թղթակցի հետ զրույցներում միայն մեկ հոգի է պնդել, որ Վանի Բաշքալեի շրջանում մի քանի տարի առաջ մի քանի սփյուռքահայեր են եկել մի քանի թուրքերի ուղեկցությամբ եւ գտել մի քանի կիլոգրամի հասնող ոսկի:

Լուրեր Հայաստանից – NEWS.am

Մայիս 13, 2011