Ինչպես հաղորդում է «Ջիհան» գործակալությունը Դիարբեքիրի (Տիգրանակերտ) Սուրի քաղաքապետարանի՝ քրդերենի քուրմանջի և զազաերեն* խոսվածքներին, ասորերենին և հայերենին տիրապետող աշխատակիցները ստանալու են 25 լիրա հավելյալ աշխատավարձ:
Քաղաքապետարանը սեփական «Բազմալեզու տեղական ինքնակառավարում» նախաձեռնության շրջանակում կայացրած որոշումը ներառել է աշխատանքային պայմանագրի մեջ: Այսուհետ, աշխատանքային պայմանագրում միջազգային լեզու համարվող անգլերենի հետ մեկտեղ, տեղական լեզուներ համարվող քրդերեն (քուրմանջի և զազաերեն), ասորերեն ու հայերեն լեզուների դասընթացների հաճախած և համապատասխան փաստաթուղթ ներկայացրած աշխատակիցները ստանալու են 25 լիրա հավելյալ աշխատավարձ:
Սուրի քաղաքապետ Աբդուլահ Դեմիրբաշը նշել է, որ այս քայլին դիմելով` ցանկանում են ոգևորել աշխատակիցներին՝ լեզուներ սովորելու հարցում, որպեսզի ավելի որակյալ և ավելի լավ ծառայություն մատուցեն բնակչությանը` վերացնելով հաղորդակցման խոչընդոտները:
«Ջիհան» գործակալությունը
*Խմբագրության կողմից
Համաձայն քրդագիտության մեջ եղած տեսակետների`
ա) քրդերը և զազաները նույնացվում են,
բ) զազաները համարվում են ազգային ինքնուրույն միավոր:
Խորհրդային և արևմտյան մի շարք գիտնականներ (Վ. Նիկիտին, Մ. Հասրաթյան, Մ. Լազարև և այլք) զազաներին ազգային ինքնուրույն միավոր չեն համարում, սակայն զազաների կրոնը, լեզուն և կենցաղը հակառակն են ապացուցում:
Պրոֆեսոր Գ. Ասատրյանը գրում է. «Զազաները քրդերից տարբերվում են կրոնով (ի տարբերություն քրդերի, որոնք շաֆիի ուղղության սունի մահմեդական են, զազաները դավանում են ծայրահեղ շիականության մի ուղղություն, որը զգալի չափով կրել է տեղական և քրիստոնեական հավատների դրոշմը) և լեզվով` չնայած որ և’ քրդերենը, և’ զազաերենը պատկանում են հնդեվրոպական լեզվաընտանիքի իրանական ճյուղի հյուսիսարևմտյան ենթաճյուղին» (Ասատրյան Գ., Զազաների ավանդական աշխարհայացքը, Իրան–նամէ, 16-17 (1995-1996), էջ 38): Զազաները, տևականորեն ապրելով քրդերի հարևանությամբ, բնականաբար, ենթարկվել են որոշ ազդեցության: Այս հանգամանքն էլ, անշուշտ, նպաստել է այն տեսակետին, ըստ որի` նրանք քրդեր են:
Leave a Reply