Կինեմատոգրաֆիան՝ չորս լեռան մեջ

Դերսիմը նախապատրաստվում է Թունջելիի (Դերսիմ) քաղաքապետարանի հովանավորությամբ 2011 թ. մայիսի 20-29-ը կայանալիք միջազգային փառատոնին: Առաջին անգամ այս տարի կազմակերպվող «Դերսիմի` մարդու իրավունքների մասին ֆիլմերի միջազգային փառատոնն» իր հարուստ ծրագրի և անվանի մասնակիցների շնորհիվ կդառնա Թուրքիայում «մարդու իրավունքների» թեմայով առաջին միջազգային փառատոնը:

Աշխարհի լավագույնները

Կինոթատրոն չունեցող Թունջելիում փառատոնի համար երեք սրահներ վերածվել են կինոթատրոնի: Փառատոնին կմասնակցեն Դերվիշ Զաիմը` «Ստվերեր և կերպարանքներ» ֆիլմով, Սերեն Յուջեն` «Մեծամասնություն» ֆիլմով, Շիար Աբդին` «Երթ» ֆիլմով, Մուրադ Սարաչօղլուն` «72-րդ սրահ» ֆիլմով, Հալուք Ունալը` «Թաքնված կյանքեր» ֆիլմով, Սեդթա Յըլմազը` «Ճնշում» ֆիլմով, Ումուր Հոզալթըէ «Կորսված ազատություն» ֆիլմով և Աթիլլա Ջենգիզը` «Որդի» ֆիլմով, որի նկարահանումները կատարվել են Դերսիմում: Փառատոնի` «Հարգանքի տուրք վարպետներին» բաժնում կցուցադրվի Յըլմազ Գյունեյի «Պատ» ֆիլմը: Բացի այդ` Դերսիմի ֆիլմասեր հանդիսատեսների համար կցուցադրվեն համաշխարհային կինեմատոգրաֆիայի այնպիսի ընտրանիներ, ինչպիսիք են Դարրեն Արոնովսկու «Սև կարապ»-ը, Էլիա Սուլեյմանի «Հետ մնացածը», Իսիար Բոլլենի «Անձրևին անգամ»-ը, Քեն Լոչի «Վտանգավոր ճամփան», Մարիան Քրիզանի «Վաղը», Թոնի Գաթլիֆի «Ազատություն»-ը, Բահման Ղոբադիի «Ոչ ոք չի խոսում Իրանի կատուների մասին»-ը:

Փառատոնին կցուցադրվեն նաև «Բնության զավակները» և «Դերսիմի մերձավորները» փաստավավերագրական ֆիլմերը:

Բացի այդ՝ փառատոնի ժամանակ նախատեսվում են Հրանտ Դինքի հիշատակին նվիրված «Խղճի ֆիլմերը» և Թուրքիա-Հայաստան կինոպլատֆորմի շրջանակներում նկարահանված ֆիլմերի նմուշների ցուցադրություններ, իսկ Քազըմ Քոյունջուի և Ահմեդ Քայայի հիշատակին նվիրված ցուցադրությունները կիրականացվեն ռեժիսոր Ումիթ Քըվանչի մասնակցությամբ:

Փառատոնի ծրագրում տեղ են գտել նաև հատուկ երեխաների համար ընտրված ֆիլմերի և մարդու իրավունքների թեմայով կարճամետրաժ ֆիլմերի ցուցադրություններ:

12.05.2011

Ռադիկալ