Մերսինում Հրանտ Դինքի անվամբ այգի և հուշարձան է բացվել

Մերսինի կենտրոնական Աքդենիզ գավառում հանդիսավոր կերպով Հրանտ Դինքի անվամբ այգի և հուշարձան է բացվել, որը կառուցել է տվել Խաղաղություն և ժողովրդավարություն կուսակցության անդամներից բաղկացած քաղաքապետարանը:

Մերսինի կենտրոնական Աքդենիզ գավառում հանդիսավոր կերպով Հրանտ Դինքի անվամբ այգի և հուշարձան է բացվել, որը կառուցել է տվել Խաղաղություն և ժողովրդավարություն կուսակցության անդամներից բաղկացած քաղաքապետարանը: Հրանտ Դինքի այրին` Ռաքել Դինքը, հուզվեց, երբ բացման արարողության ժամանակ լսվեցին «Սարը Գելին» թյուրքյուի հայկական տարբերակի երաժշտության հնչյունները:

Աքդենիզի քաղաքապետարանի կողմից կառուցված Հրանտ Դինքի անվան այգու բացման արարողությանը մասնակցեցին Դինքի այրին` Ռաքել Դինքը, Խաղաղություն և ժողովրդավարություն կուսակցության սատարած անկախ պատգամավորության թեկնածու Էրթուղրուլ Քյուրքչյուն, լրագրողներ Ալի Բայրամօղլուն, Սեզայի Սարըօղլուն, Օղուզհան Մյուֆթյուօղլուն, արվեստագետ Մուստաֆա Ալաբորան և «Քարդեշ թյուրքյուլեր» խմբի անդամները, լատինական կաթոլիկ եկեղեցու հոգևոր առաջնորդ Ռոբերտո Ֆերրարին և արաբական ուղղափառ եկեղեցու հոգևոր առաջնորդ Ջոչքուն Թեյմուրը:

Արարողության ժամանակ ելույթ ունեցած Աքդենիզի քաղաքապետ Ֆազըլ Թյուրքը նշեց. «Ես ապրում եմ քաղաքապետի պաշտոնում եղած ընթացքում ամենապատվաբեր պարտականություններիցս մեկն իրականացնելու պատիվն ունենալու զգացումը: Այսօր բոլորի խղճի կողմից անընդունելի համարվող ուխտադրուժ հարձակման ժամանակ սպանված Հրանտ Դինքի անունն ընդմիշտ անմոռանալի է մնալու, և մենք իր անունը դնում ենք հիմնովին վերանորոգված այս այգու վրա»:

Հրանտ Դինքին որպես «ընկեր» հիշատակած Էրթուղրուլ Քյուրքչյուն ևս ասաց, թե պետությունը չի կարողացել պաշտպանել Դինքին: 68-ականների միության նախագահ Հասան Քափըքըրանը հայտնեց, թե Հրանտ Դինքն սպանվել է պաշտոնական պատմագրության անգիրները չկրկնելու պատճառով: Դինքի այրին` Ռաքել Դինքը շեշտելով, թե իր ամուսնու անունը լսող յուրաքանչյուր անձ հիշում է խտրականության, ցեղապաշտության և ֆաշիզմի հարուցած վայրենության մասին, նաև նշեց. «Նրա բացակայությունը մարդուն ավելի շատ է ճնշում: Այսօր կատարվող այս առերեսումը վերջինիս մի կետն է ընդամենը, և ես համոզված եմ, որ այն մեծ օգուտներ է բերելու ապագայում: Ամուսինս ողջ կյանքի ընթացքում միայն ճշմարտությունների համար է պայքարել: Նա ձգտել է խոսել բոլոր ժողովուրդների կրած անարդարությունների մասին, որի գինը սեփական կյանքը եղավ: Սակայն միակ բանը, որ մխիթարում է մեզ, այն է, որ նրա սպանությունից հետո իր պես մտածողներն ավելացան, որի վկայությունն այսօր տեսնում եմ այստեղ: Նրա անունը լսող յուրաքանչյուր անձ հիշում է խտրականության, ցեղապաշտության և ֆաշիզմի հարուցած վայրենության մասին»:

Ելույթներից հետո «Քարդեշ թյուրքյուլեր» խումբը հայերենով երգեց «Սարը Գելինը»-ը, որի ընթացքում Ռաքել Դինքը հուզվեց: Այնուհետև կատարվեց Հրանտ Դինքի անվան այգու և հուշարձանի բացումը: Ռաքել Դինքը, երբ տեսավ հուշարձանը, որի պատվանդանին փորագրված էին Դինքի նկարները և պատառիկներ նրա հոդվածներից, իսկ երեք կողմերում` թռչող աղավնիներ, աչքերը լցրեց և ասաց. «Շատ լավ է նրան ներկայացնում»:

Դողան լրատվական գործակալություն

07.05.2011