Ես սփյուռք չեմ

Հայաստանի սփյուռքի նախարարը Ստամբուլում մրցանակներ է շնորհել Թուրքիայի հայ մտավորականներին:

Գրող Մկրտիչ Մարկոսյանը մրցանակն ստանալուց առաջ հետևյալն է ասել Hürriyet Daily News պարբերականին. «Հայաստանից կարող է մեզ մրցանակ շնորհել յուրաքանչյուր նախարար, սակայն ես չէի ցանկանա, որ Թուրքիայում լիներ սփյուռքի նախարարը: Ես ապրում եմ այն հողերում, որոնցում բնակվել եմ հազարամյակներ շարունակ: Ես սփյուռք չեմ: Դա սարսափելի հեգնանք է»:

Հայաստանի սփյուռքի նախարար Հրանուշ Հակոբյանը նախանցած օրը Ստամբուլում մրցանակներ է շնորհել պոլսահայ մտավորականներին, սակայն երեկ Hürriyet Daily News օրաթերթի լրագրողներից Վերջիհան Զիֆլիօղլուի հեղինակությամբ հրապարակված տեղեկության համաձայն` հայկական համայնքի առաջատար ներկայացուցիչներն ասելով, թե իրենք բնակվում են այն տարածքներում, որտեղ հազարամյակներ շարունակ ապրել են իրենց պապերը, այսինքն` մայր հայրենիքում, իրենց առարկությունն են հայտնել` նշելով. «Մենք սփյուռք չենք»:

Գրող Մկրտիչ Մարկոսյանը Հայաստանի անունից իրենց ոլորտներում հաջողակ եղած հայերին տրվող ոսկե մեդալն ստանալուց առաջ ասել է Hürriyet Daily News-ին. «Հայաստանից կարող է մեզ մրցանակ շնորհել յուրաքանչոյւր նախարար, սակայն ես չէի ցանկանա, որ Թուրքիայում լիներ սփյուռքի նախարարը: Ես ապրում եմ այն հողերում, որոնցում բնակվել եմ հազարամյակներ շարունակ: Ես սփյուռք չեմ: Դա սարսափելի հեգնանք է»:

Մարկոսյանը քննադատել է նաև Անկարային և նշել. «Քանի որ դա պաշտոնական հրավեր էր, կցանկանայինք, որ միջոցառմանը մասնակցեր նաև որևէ թուրք նախարար կամ ներկայացուցիչ»:

Հանձնվել է 15 մրցանակ

Հակոբյանը Ստամբուլում կայացած Կանանց համաշխարհային գագաթնաժողովին մասնակցելուց հետո մրցանկաներ է շնորհել 15 հոգու, այդ թվում` Մ.Մարկոսյանին, երգահան Կարո Մաֆյանին, Ջենք Թաշքանին (Մաժաք Թոշիքյան) և պետական օպերայի ու բալետի առաջին հայ կին մենակատար Ալիս Մանուկյանին: Ճանաչված երգահաններից Կարո Մաֆյանը հանդես է եկել հետևյալ հայտարարությամբ. «Մենք բնակվում ենք այն տարածքներում, ուր ապրել ենք հարյուրամյակներ շարունակ: Եվ շարունակում ենք վճարել այն պարտքը, որ ունենք այս հողերի հանդեպ: Ես պատրաստ եմ ձեռքիցս եկածն անել` Թուրքիայի և Հայաստանի միջև երկխոսության շարունակվելու համար: Նմանապես շատ կարևոր է Հայաստանից մրցանակ ստանալը` թուրքական երաժշտության մեջ ունեցածս նպաստի համար»:

Հրավերը հուսադրող է

Արարողությունից առաջ Hürriyet Daily News-ին հարցազրույց տված Պոլսո հայոց պատրիարքի գլխավոր փոխանորդ Արամ Աթեշյանը նույնպես ասաց. «Հակոբյանի` Թուրքիա հրավիրվելը շատ հուսադրող զարգացում է Թուրքիայի հայերի համար»:

Մասնակցեց պատարագին

Հայաստանի սփյուռքի նախարար Հրանուշ Հակոբյանը մասնակցեց Ստամբուլի Գում Գափու թաղամասում գտնվող Պոլսո հայոց պատրիարքարանի եկեղեցում մատուցված պատարագին: Պատարագից հետո պատրիարքի փոխանորդ Արամ Աթեշյանը Հակոբյանի պատվին ընդունելություն կազմակերպեց եկեղեցուն կից սենյակում:

10.05.2011

Իհլաս լրատվական գործակալություն