Դիարբեքիրի քաղաքապետը Սուրբ Կիրակոսի բացման ժամանակ հայերին անակնկալներ է խոստանում

Դիարբեքիրի քաղաքապետ Օսման Բայդեմիրը ոգեւորությամբ սպասում է հայկական Սուրբ Կիրակոս եկեղեցու վերաբացմանը եւ  այդ ժամանակ Դիարբեքիր  ժամանող հայերին անակնկալներ է խոստանում:

Ինչպես տեղեկացնում է NEWS.am-ի թղթակիցը Դիարբեքիրից,  Օսման Բայդեմիրը հայ եւ թուրք լրագրողների հետ հանդիպման ժամանակ շեշտել է, որ իր երազանք է՝ Դիարբեքիրում լսել թե Էզանի, թե եկեղեցու զանգի ձայնը, որի շրջանակներում էլ իրականացվում է հայկական Սուրբ Կիրակոս եկեղեցու վերականգնումը:

NEWS.am-ի թղթակիցը հարցրել է Դիարբեքիրի քաղաքապետից, թե ե՞րբ է նախատեսված ավարտել վերանորոգումն ու իրականացնել բացումը, որին ի պատասխան քաղաքապետը նշել է. «Այս պահին հայտնի չէ: Եկող շաբաթվա ընթացքում Ստամբուլից մեծարգո հյուրեր են գալու,(Պոլսո հայոց պատրիարքարանի ներկայացուցիչները) որոնց հետ քննարկվելու է եկեղեցու բացման ամսաթիվն ու բացման հետ կապված միջոցառումները: Ես խոստանում եմ, որ Սուրբ Կիրակոսի եկեղեցու վրա խաչ է լինելու, Աղթամարի պես առանց խաչ չի վերաբացվելու»:

Այն հարցին, թե ինչպե՞ս է Դիրաբեքիրի քաղաքապետարանը պատրաստվում յդիմավորել հայերին եւ ի՞նչ միջոցառումներ են նախատեսված բացման ժամանակ, Օսման Բայդեմիրը նշել է, թե հայերի համար հաճելի անակնկալներ են պատրաստում, որը կցանկանար դեռեւս գաղտնի պահել: Նա շեշտել է, թե ցանկանում են, որ բացմանը ներկա լինեն Թուրքիայի, Հայաստանի եւ այլ երկրների ներկայացուցիչներ:

Նշենք, որ 1400 աղոթատեղի ունեցող Դիարբեքիրի Սուրբ Կիրակոս եկեղեցին կառուցվել է 16-րդ դարում,  Հանչեփեք թաղամասում, որը տեղի մահմեդականները անվանել են «գյավուրների թաղամաս» քանի որ մեծ թվով քրիստոնյաներ են ապրել մինչեւ Հայոց ցեղասպանությունը:

Մերձավոր արեւելքի ամենամեծ եկեղեցու զանգակատունը 1913-ին ավերվել է կայծակի հարվածից, որից հետո տեղի հայերը նոր զանգակատուն են կառուցել, որի զանգը ձուլվել էր  ոսկու եւ պղնձի խառնուրդից: Սակայն 1915-ին այս անգամ կայծակի հարվածած տեղին հարվածեցին թուրքերը՝ թնդանոթով ավերելով զանգակատունը միայն նրա համար, որ այն ավելի բարձր էր շրջակայքի մզկիթների մինարեթներից:

 Սուրբ Կիրակոս եկեղեցին 1980-ից թողնվել է բախտի քմահաճույքին։ Այնուհետ, Ստամբուլում ապրող դիարբեքիրցի հայերը ստեղծել են «Սուրբ Կիրակոս հիմնադրամ»՝ վերանորոգելու եկեղեցին։ 2,5 մլն դոլար արժողությամբ վերանորոգման ծախսերի 70 տոկոսը իր վրա է վերցրել հայկական հիմնադրամը, իսկ 30-ը՝ Դիարբեքիրի քաղաքապետարանը։

Մայիս 09, 2011

Լուրեր Հայաստանից – NEWS.am