“Սարը Գելին”-ից հետո մի նոր սկանդալ

Հայոց ցեղասպանության 96-րդ տարելիցին մեծ ուշադրություն գրավեցին Ստամբուլի հենց սրտում գտնվող կրթական մի հաստատությունում տեղի ունեցած դեպքերը: Ազգային անվտանգության դասընթացի ուսուցիչը Սկյուտար թաղամասում գտնվող Բուրհան Ֆելեք լիցեյի տասներորդ դասարանի աշակերտներին ստիպել է դիտել հայերին ու քրդերին որպես “դավաճան” ու “թշնամի” ներկայացնող տեսարաններ:

Սկանդալը մի քանի օր առաջ է գրանցվել: Տասներորդ դասարանի սաները հանվել են դասից և տարվել կոնֆերանսների սրահ: Ազգային անվտանգության դասընթացի ուսուցիչ Ս. Օ-ն հարկադրել է աշակերտներին դիտել լուսանկարներ, որոնցում կային իբրև թե հայերի և քրդերի կողմից սպանվածների դիակներ:

Աշակերտները փակել են աչքերը և ականջները

Շատ աշակերտներ փակել են աչքերն ու ականջները և չեն ցանկացել դիտել լուսանկարները: “Ազգային անվտանգության” դասընթացի ուսուցիչը սրահից դուրս գալ ցանկացող աշակերտներին թույլ չի տվել դա անել:

Սկանդալի մասին թուրքական “Էթքին” լրատվական գործակալությանը մանրամասներ հաղորդած 10-րդ դասարանի աշակերտները պատմել են, թե ազգային անվտանգության դասընթացի ուսուցիչը խոսել է տեսարանների ցուցադրման ընթացքում, ասել, թե “հայերը սպանել են թուրքերին”, իսկ քրդերին էլ ստորացնելով` նրանց տվել “թշնամի” բնորոշումը:

Լա’վ, իսկ ո՞վ է Հրանտ Դինքը

Իսկ երբ աշակերտներն ուսուցչի խոսելու ընթացքում վերջինիս ուղղել են “Լա’վ, բայց Հրանտ Դինքը հայ էր և լրագրող, իսկ ովքե՞ր էին նրան սպանողները”, “Ինչո՞ւ սպանվեց Հրանտ Դինքը” հարցերը, ուսուցիչը լռեցրել է նրանց: Աշակերտները հարցազրույցի ժամանակ հայտնեցին. “Երբ մենք Հրանտ Դինքի անունը տվեցինք, դասատուն անմիջապես թեման փոխեց և մեզ լռեցրեց”:

Դիտել չցանկացողները բացակա կստանան

Աշակերտները, ովքեր հայտնեցին, որ ականատես են եղել, թե ինչպես են որոշ աշակերտներ ազգային անվտանգության դասընթացի ուսուցչի պատմություններից քաջալերվելով` հայերին ու քրդերին որպես “թշնամի” և “դավաճան” բնորոշել, նաև նշեցին, թե Ս. Օ-ն աշակերտներին ասել է` “Դիտել չցանկացողները կարող են դուրս գալ”, սակայն դուրս գալ ուզողներին թույլ չի տվել դա անել: Աշակերտները նաև հայտնեցին. “Մեր ուսուցիչը պահանջեց երեք դասարանների մատյանները: Մատյանների միջոցով “ներկա-բացակա” արեց: Բացի այդ, դուրս գալ ցանկացող աշակերտներին թույլ չտվեց դա անել: Ասաց, թե “Դա մեր պատմությունն է: Պետք է իմանաք”:

Դեպքը հիշեցնում է “Սարը Գելին” վավերագրական ֆիլմը

Այս սկանդալը հիշեցնում է 2009 թ. դարձյալ դպրոցներում ցուցադրված “Սարը Գելին. Հայկական հարցի էությունը” վավերագրական ֆիլմի դեպքը: Ազգային անվտանգության տնօրինության կողմից Ստամբուլի դպրոցներում ցուցադրված “Սարը Գելին” փաստագրական ֆիլմը քննադատության էր ենթարկվել ցեղապաշտական, խտրական, թշնամական բովանդակություն ունենալու պատճառով: Բացասական արձագանքների արդյունքում, ֆիլմի ցուցադրությունը դադարեցվել էր:

Էթքին լրատվական գործակալություն

29.04.2011

http://www.etha.com.tr/Haber/2011/04/29/guncel/sari-gelinden-sonra-yeni-skandal/