Ստամբուլի հայկական եկեղեցու 100 տարվա փակ դռները շուտով կբացվեն

Քրիստինե Աղալարյան

Ստամբուլի հայկական Սուրբ Որդվոց Որոտման եկեղեցում 100 տարի է՝ որևէ արարողություն չի եղել: Եկեղեցու` 100 տարուց ի վեր փակ մնացած դռները հուլիսից կբացվեն: «Առաջին աշխարհամարտէն ի վեր այս տեղը որպէս եկեղեցի չէր օգտագործված: Շատ երկար տարիներու երազ էր նորոգությունը. 1987-ին այդ երազը կար, ծրագիրը պատրաստած էր, բայց շատ մեծ գումարներ կազմած էր, և որպէս երազ մնացած էր»,-«Հետքի» հետ զրույցում նշում է Վաղարշակ սարկավագը:

Այս օրերին Սուրբ Որդվոց Որոտման եկեղեցում մեծ թափով ընթանում են վերանորոգման աշխատանքները: Եկեղեցին կպահպանի իր նախկին տեսքը, սակայն միայն որպես եկեղեցի չի գործի. կծառայի նաև որպես մշակութային կենտրոն:

Սուրբ Որդվոց Որոտմանը Պոլսո Հայոց պատրիարքարանի տարածքում գտնվող երեք եկեղեցիներից մեկն է: Նշված եկեղեցիները պատկանել են տարբեր պատրիարքարանների. Սուրբ Խաչը Էջմիածնին է ենթարկվել, Մայր Աստուածածինը` Ստամբուլի պատրիարքարանին, իսկ վերանորոգվողը՝ Երուսաղեմին:

Սուրբ Որդվոց Որոտման եկեղեցին կառուցվել է Մահմուդ Երկրորդի հրահանգով: Այն բազիլիկ ոճի միակ առաքելական եկեղեցին է Ստամբուլում. քաղաքին համահունչ կառուցելու նպատակով եկեղեցին տարբերվել է Արևմտյան Հայաստանի մյուս հայկական եկեղեցիների ճարտարապետական տեսքից: Սակայն տուժել է երկրաշարժի ժամանակ: «Եթե վեց ամիս առաջ գայիք այս եկեղեցի, անձրևանոցով պետք է պտտվեիք»,- ասում է վերանորոգման նախագծի ղեկավար Գևորգ Կարագյոզեանը:  

«Ստամբուլը 2010 եվրոպական մշակույթի մայրաքաղաք» գործակալությունը արդեն վեց ամիս է՝ սկսել է Գում Գափու թաղամասում գտնվող Սուրբ Որդվոց Որոտման եկեղեցու վերականգնման աշխատանքները: Եկեղեցու վերանորոգման ծախսերը կազմել են 2 մլն 200 հազար լիրա: 70 տոկոսը հատկացրել է թուրքական կառավարությունը, իսկ 30-ը՝ Պոլսո Հայոց պատրիարքարանը: «Ամենակարևորը. առաջին անգամ է, որ Օսմանյան պետության մեջ կառավարությունը այսպիսի մեծ դրամ է հատկացնում եկեղեցու վերանորոգման համար»,- ասում է Գևորգ Կարագյոզեանը:

Հունիսի վերջին տեղի կունենա եկեղեցու բացումը: Չնայած նախապես ծրագրված է, որ եկեղեցին նաև մշակութային կենտրոն է լինելու, Գևորգ Կարագյոզեանը հավաստում է, որ արարողություններ էլ կարող են լինել, կլինի նաև մոմ վառելու տեղ:

Նշենք, որ Հայոց պատրիարքարանի ենթակայության տակ այժմ գործում է հայկական 38 եկեղեցի:

 Ստամբուլ

3 մայիսի, 2011

http://hetq.am/arm/news/873/