Գյուլն ու Էրդողանը պետք է ընդունեն հայերի կոտորածը, որից հետո ծաղիկներ կդնենք Ծիծեռնակաբերդում. Դիարբեքիրի քաղաքապետ

Դիարբեքիրի (Տիգրանակերտ) քաղաքապետ, Խաղաղություն եւ ժողովրդավարություն քրդական կուսակցության անդամ Օսման Բայդեմիրն իր աշխատասենյակում ընդունել է հայ եւ թուրք լրագրողների խմբին եւ պատասխանել նրանց հարցերին:

Ինչպես տեղեկացնում է NEWS.am-ի թղթակիցը Դիարբեքիրից, քաղաքապետ Օսման Բայդեմիրը լրագրողների խմբին դիմավորել է ծաղիկներով՝ նշելով, որ իր 7-ամյա պաշտոնավարության մեջ հայ լրագրողների հետ հանդիպումն իր համար ամենաերջանիկ օրերից մեկն է: Քուրդ քաղաքապետը հիշեցրել է, որ մոտ 100 տարի առաջ Դիարբեքիրը զրկվեց իր հարստությունից՝ բռնի տեղահանության հետեւանքով, որի ընթացքում մեծ կորուստներ եւ զրկանքներ են կրել Դիարբեքիրից հեռացած հայերն ու ասորիները:

«Դիարբեքիրը միայն մահմեդականների քաղաք չէ: Այն քրիստոնեական քաղաք է իր Սուրբ Կիրակոս, Սուրբ Մարիամ Աստվածածին եւ մյուս եկեղեցիներով: Իր ճարտարապետությամբ այն միաժամանակ հայկական եւ ասորական քաղաք է: Իմ երազանքն է՝ ստեղծել այնպիսի քաղաք, որտեղ իրար կխառնվեն էզանի ձայնն ու եկեղեցու զանգերը: Դրա համար էլ մենք սկսել ենք վերանորոգել Մերձավոր Արեւելքի ամենամեծ քրիստոնեական եկեղեցին»,-ասել է Օսման Բայդեմիրը:

Թուրք լրագրողներից մեկը հարցրել է, թե Դիարբեքիրի քաղաքապետարանը ի՞նչ քայլեր է ձեռնարկում քննարկելու 1915-ի Հայոց ցեղասպանությունը, քանի որ այդ ժամանակ մեծ թվով հայեր հեռացան Դիարբեքիրից: «Մեծ ողբերգություններ են տեղի ունեցել: Ցավոք, նոր սերունդը, հիմնականում Թուրքիայի արեւմտյան հատվածում, դեռեւս չի հասկացել, թե ինչ է տեղի ունեցել: Եթե Թուրքիան կարողանա առերեսվել 1915-ի եւ քրդական ապստամբությունների ընթացքում տեղի ունեցածների հետ, միասին կապրենք լուսավոր ապագայում:

Մենք կարծում ենք, որ մեկ անգամ կոնկրետ բան անելը հազար անգամ ասելուց ավելի է լավ է: Մենք դրանով ենք առաջնորդվել եւ վերանորոգեցինք հայկական գերեզմանոցը, հիմա վերանորոգում ենք եկեղեցիները: Կառուցվող քուրդ գործչի անունով թանգարանում ներկայացված է լինելու Դիարբեքիրը ներկայացնող բոլոր ազգություններին՝ հայերին, եզդիներին, ասորիներին եւ մահմեդականներին: Այս նոյեմբերին Բիլգե համալսարանի հետ կոնֆերանս ենք կազմակերպելու, որի ընթացքում փորձելու ենք ստանալ ձեր տված հարցերի պատասխանները: Այդ թեմայի շուրջ Դիարբեքիրում ցուցահանդես կլինի»,-ընդծել է Դիարբեքիր քաղաքապետը:

Մեկ այլ թուրք լրագրող հետաքրքրվել է Բայդեմիրից, թե նա, որպես քաղաքապետ, ի՞նչ քայլեր է անում, որպեսզի նպաստի հայ-թուրքական հարաբերությունների կարգավորմանը, որոնք վերջին շրջանում սառեցվել են: «Իհարկե, որպես Դիարբեքիրի քաղաքապետ ամեն տեսակ ակտիվություն եւ նախաձեռնություն ցանկանում եմ ցուցաբերել: Չպետք է մոռանալ, որ հայերն այս տարածաշրջանի բնիկ ժողովուրդն են թե Միջագետքում, թե Անատոլիայում (Արևմտյան Հայաստանում-Ակունքի խմբագրություն): Աննորմալ եւ անընդունելի է, որ մինչեւ այսօր չի կարգավորվել հարաբերությունները: Պետք է հրաժարվել մերժողական եւ ժխտողական քաղաքականությունից:

Ներկա սերունդը մեղավոր չէ դարասկզբին տեղի ունեցածի համար, սակայն պարտավոր է ասել՝ այո, կոտորած է եղել, ես տխուր եմ դրա համար, ես ցավում եմ դրա համար: Այս ամենը միայն իմ ասելով չի օգնի հարցի լուծմանը: Դա պետք է ասի վարչապետը, նախագահը, խորհրդարանը: Այդ խոսքերից հետո մենք բոլորովս կգնանք Երեւան, Ցեղասպանության հուշարձանին ծաղիկներ կդնենք, եւ կսկսվի հարաբերությունների կարգավորումը»,-շեշտել է Դիարբեքիրի քաղաքապետը:

NEWS.am