Թուրքիայում Հուշարձանների համաշխարհային հիմնադրամի հետ համագործակցությամբ նոր ծրագիր է մեկնարկում Անիում Մայր տաճարի ու Սուրբ Փրկիչ եկեղեցու պահպանման ուղղությամբ: Այդ մասին հայտարարել է Թուրքիայի մշակույթի նախարար Էրթուղրուլ Գյունայը: Թուրքիան սկսել է հին հայկական տաճարի եւ եկեղեցու պահպանման նախագծի իրագործումը որպես Հայաստանի հետ հաշտեցման բարի կամքի դրսեւորում, գրում է Associated Press-ը:
«Անին համաշխարհային նշանակություն ունի եւ բարդ աշխատանք է պահանջում: Մենք հուսով ենք, որ նոր շունչ տալով երբեմնի հոյակերտ շինությունների ավերակներին, նոր տնտեսական հնարավորություններ կստեղծենք տարածաշրջանի համար»,- նկատել է Գյունայը` այդպես էլ չպատասխանելով հարցին, թույլատրվելո՞ւ են արդյոք պատարագներ մատուցել այդ եկեղեցիներում վերանորոգումից հետո:
Սուրբ Փրկիչ եկեղեցին, որը 1996թ. ընդգրկվել է UNESCO-ի համաշխարհային ժառանգության ցանկում, կառուցվել է 1036թ. Բագրատունիների հայկական արքայատոհմի օրոք:
Մայիս 04, 2011
Leave a Reply