Ոչ թե հայկական ծագմամբ, հայկական արմատներով, այլ` հայ

Որտեղ լսում կամ կարդում եմ հայկական արմատներով, հայկական ծագմամբ արտահայտությունը, լուրջ անհանգստանում եմ: Հայ լինելով` հայկական ծագմամբ կամ հայկական արմատներով արտահայտությունն ինձ հիշեցնում է վախի կամ այլ կենսական պատճառներով մուսուլման դարձած ժամանակաշրջաններն ու մուսուլմաններին, որոնց տոհմում ինչ-որ ձևով հայեր կան: Կարիք չկա հայտնել, որ հայն ունի հայկական ծագում կամ էլ հայկական արմատներ: Սա հայտնի ճշմարտություն է, բոլորն էլ գիտեն, որ հայը թուրքական, ռուսական կամ էլ ֆրանսիական ծագմամբ չի լինելու: Ցավոք, այս խոսքերը վերջին շրջանում շատ արդիական են դարձել: Վերջերս զինվորական ծառայության ժամանակ նահատակված զինվոր Սևակ Շահին Բալըքչըն գրեթե բոլոր թերթերում ու հեռուստալիքներում հիշատակվեց որպես հայկական ծագմամբ կամ արմատներով: Այն, որ բազմաթիվ մտավորական հարգարժան գրողներ ու գիտնականներ օգտագործում են այս արտահայտությունը, ցույց է տալիս, թե որքան տարածված է այս սխալը: Եվ որ ամենատարօրինակն է, այս արտահայտությունն օգտագործում են նաև որոշ հայեր: Վստահ եմ, որ այս արտահայտություններն օգտագործող շատ մարդիկ վատ մտադրություններ չունեն: Երբ մեկից խոսք է գնում, հնարավոր է հայտնել նրա էթնիկ պատկանելությունը, սակայն դժվար է հասկանալ, թե ինչու չեն բավարարվում հային հայ, հույնին հույն ասելով: Ինչպես հնում, այնպես էլ հիմա ասոմ են՝ հայկական կամ էլ հունական արմատներով: Ինչու՞ չեն բավարարվում` ասելով, թե ժանդարմերիայի հայ զինվոր Սևակ Շահին Բալըքչը զոհվեց: Եթե հայ ասելով վախենում են, որ կհասկացվի Հայաստանի հայ, թող ասեն Թուրքիայի հայ, ոչ ոք չի առարկում: Ըստ էության՝ մենք այդպես ենք ասում` Եգիպտոսի հայ, Իրանի հայ, Թուրքիայի հայ:

Համաձայն իմ համոզման` ծագմամբ և արմատներ ունեցող բառերն անհրաժեշտ է օգտագործել միայն այն դեպքում, երբ նկատի ունենք տարբեր ծագում ու արմատներ ունեցողների: Այսօր թուրքացած հային կամ էլ ազգում հայ եղած թուրքին կարող ենք ասել հայկական արմատներով կամ հայկական ծագմամբ թուրք: Եթե Դերսիմի ալևիներից ոմանց ասեն հայկական ծագմամբ կամ հայկական արմատներով, սխալ չի լինի, որովհետև նրանք արդեն չեն ասում՝ ես հայ եմ: Նույն ձևով ասում են նաև համշենցիների համար, որովհետև նրանք արդեն չեն ասում՝ ես հայ եմ: Այստեղ նպատակն այն է, որ ինչ- որ կերպ մարդկանց հիշեցնեն իրենց արմատների մասին: Սա երբեմն շովինիստական, նույնիսկ ռասիստական նպատակով վատաբանելու համար է օգտագործվում, ինչպես, օրինակ, նախագահ Գյուլի և Քըլըչդարօղլուի մայրերի հայկական ծագում ունենալը:

Խնդրում եմ՝ այլևս ուշադիր լինենք և նմանատիպ հոդվածներ կամ լուրեր գրողներին նախազգուշացնենք:

Սիրով`Մուրադ Բիբերօղլու

http://hyetert.blogspot.com/2011/05/ermeni-asll-ermeni-kokenli-degil-ermeni.html