ԱՄՆ Ներկայացուցիչների պալատի խոսնակ Նենսի Փելոսին չկարողացավ իրականացնել Հայոց ցեղասպանության բանաձևի ընդունման առնչությամբ հայերին տված խոստումը, և Ցեղասպանության բանաձևն այդպես էլ չներառվեց Պալատի երեկվա լիագումար նիստի օրակարգում։ Այս մասին է գրում թուրքական Milliyet օրաթերթը՝ միևնույն ժամանակ տեղեկացնելով, որ Ներկայացուցիչների պալատի նիստը շարունակվելու է այսօր։
«Նենսի Փելոսին պարտվեց, քանի որ նրան չհաջողվեց օրակարգ բերել Հայոց ցեղասպանության վերաբերյալ թիվ 252 բանաձևը։ Սակայն եթե բանաձևն օրակարգ բերվեր, մեծ էր հավանականությունը, որ այն կընդունվեր… Իր պաշտոնավարման ընթացքում Միացյալ Նահանգների կողմից Հայոց ցեղասպանության փաստի ընդունման համար պայքարող Փելոսին դարձյալ հետքայլ արեց»,– գրում է թուրքական պարբերականը` ավելացնելով, որ այսօր նույնպես շարունակվելու են Ներկայացուցիչների պալատի աշխատանքները, «սակայն քիչ հավանական է, որ հերթը հասնի Ցեղասպանության բանաձևին»։
Ներկայացուցիչների պալատի դեմոկրատական մեծամասնության ղեկավար Սթենի Հոյերը թուրքական Anadolu գործակալությանը տված հարցազրույցում հայտարարել է, որ հնարավոր է՝ Ցեղասպանության վերաբերյալ բանաձևը չընդգրկվի այսօրվա նիստի օրակարգում։
«Չեմ կարող ոչինչ ասել՝ արդյոք Կոնգրեսն այսօր կավարտի՞ իր աշխատանքները, թե ոչ։ Առայժմ անորոշ է նաև Հայոց ցեղասպանության վերաբերյալ բանաձևի ճակատագիրը»,– ասել է Հոյերը։
Հիշեցնենք, որ երեկ Ներկայացուցիչների պալատի լիագումար նիստի աշխատանքների մեկնարկից ժամեր առաջ հայտարարությամբ հանդես էր եկել Միացյալ Նահանգների Պետքարտուղարությունը։ Պետդեպի մամուլի քարտուղար Ֆիլիպ Քրոուլին հայտարարել էր, որ իրենք բանակցում են Կոնգրեսի Ներկայացուցիչների պալատի անդամների հետ՝ կանխելու Հայոց ցեղասպանության վերաբերյալ թիվ 252 բանաձևի ընդգրկումը Կոնգրեսի լիագումար նիստի օրակարգում։
Իսկ երբ արդեն մեկնարկել էին Ներկայացուցիչների պալատի լիագումար նիստի աշխատանքները, Միացյալ Նահանգների նախագահ Բարաք Օբամային Ցեղասպանության բանաձևի առնչությամբ իր հերթական ուղերձն էր հղել Թուրքիայի վարչապետ Ռեջեփ Թայիփ Էրդողանը՝ Սպիտակ տան ղեկավարին հիշեցնելով Խաղաղության Նոբելյան մրցանակի մասին։
«Մենք ուշիուշով հետևում ենք ողջ այդ գործընթացին։ Թեման (Ցեղասպանության բանաձևը,– Tert.am) օրակարգում չլինելը դեռ չի նշանակում, որ այն չի կարող հայտնվել այնտեղ։ Վերջին պահին որոշ բաներ կարող են լինել… Հավատում ենք, որ բոլոր նրանք, ովքեր ստանում են Նոբելյան մրցանակ, պաշտպանելու են խաղաղությունն ու սերը»,– Անկարայում Սիրայի վարչապետի հետ հանդիպումից հետո կազմակերպված ասուլիսի ժամանակ հայտարարել էր Թուրքիայի վարչապետը։
Tert.am
22.12.10
Leave a Reply